भांगरभूंय | प्रतिनिधी
घडणुकेचो व्हिडियो व्हायरल; लोकां मदीं तिडकीच्यो प्रतिक्रिया
मडगांव: कदंब ब्हामंडळाच्यो बशी रस्त्यार अचकीत बंद पडटात हें सगल्यांकूच खबर आसा. पूण शेनवारा जांबावले फोंडकुलांत रुतिल्ले कदंब बशीक शालेय विद्यार्थ्यांक धक्को दिवन भायर काडचें पडलें. हे घडणुकेचो व्हिडियो व्हायरल जावन लोकां मदीं तिडकीच्यो प्रतिक्रिया येवंक लागल्यात.
मेळिल्ले म्हायती प्रमाण हो प्रकार दक्षीण गोंयांतल्या जांबावले हांगा घडलो. विद्यार्थ्यांक हाड-व्हर करपा खातीर कदंबाच्यो बशी धाडटात. जांबावले शाळे मुखा वयल्या वाठारांत उदकाची पायपलायन घालपाचें काम सुरू आसा. थंय खड्डो काडून माती घाल्या आनी रस्त्यार खड्डे पडल्यात. शेनवारा भुरग्यांक हाडपा खातीर गेल्ल्या कदंब बशीचें रोद रस्त्यार पडिल्ल्या खड्ड्यांत रुतलें.
ह्या वेळार बस मुखार वच नाशिल्ल्यान सान पिरायेच्या विद्यार्थ्यांनी बशीक धक्को दिवपाची वेळ आयली. शिक्षणा खातीर पालक भुरग्यांक शाळेंत धाडटात, पूण कदंब म्हामंडळ शारिरीक श्रमाचेय धडे दीत आशिल्ल्याच्यो प्रतिक्रिया येवंक लागल्यात. गोंय सरकारान ह्या प्रकाराची दखल घेवची आनी अशे प्रकार जावचे न्हय हाचे कडेन लक्ष दिवचें अशी मागणी लोकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
