भांगरभूंय | प्रतिनिधी
खुनाचो गुन्यांव नोंद करून चवकशी करपाची मागणी
भांगरभूंय । प्रतिनिधी
पणजी: चिंबल जंक्शनाचेर पार्किंगां वयल्यान झगडून गुढ मरण आयिल्ल्या जयेश चोडणकार (42, म्हापशें) हाची कूड ताब्यांत घेवपाक घरच्यांनी न्हयकार दिला. खुनाचो गुन्यांव नोंद करून चवकशी करपाची मागणी ताच्या कुटुंबियांनी केल्या.
मजगतीं, बुधवारा रातीं सुमार आठ वरांचेर चिंबल जंक्शनार वाहन पार्किंगेच्या कारणा वयल्यान दोगां मदीं झगडीं जाल्ली. झगडीं करप्यां मदीं टॅक्सी चालक जयेश चोडणकार (42) हो मेरशे रस्त्या कुशीक जखमी अवस्थेंत सांपडिल्लो. ताचे दोनूय पांय चिड्डिल्ले. उपचारा खातीर ताका बांबोळे गोंय वैजकी म्हाविद्यालयांत दाखल केल्लो. पूण, उपचार सुरू आसतनाच बिरेस्तारा सकाळीं ताका मरण आयिल्लें.
ह्या प्रकरणांत कृपेश वळवयकार (बिठ्ठोण) आनी आयआरबीचो पुलीस प्रितेश हडकोणकार (चिंबल) हांकां अटक केल्या.
चिंबला एके सुवातेर बुधवारा रातीं 8 वरांच्या सुमाराक जयेश आपली गाडी पार्क करतालो. हेच सुवातेंत सद्दां एक खाजगी बस पार्क करतात. त्या बस चालकाचो आनी जयेशाचो पार्किंगे वयल्यान वाद जालो. हे दोगूय एकामेकांचे वळखीचे. हो वाद सोंपले उपरांत रातीं उसरां बस चालक आनी ताच्या सोयर्यांनी जयेशाक आपोवन माफी मागपाक सांगलें. पूण थंय लेगीत तांचे मदीं वाद जालो. थंय जयेशाक मारपेट केल्ल्याचें समजता. उपरांत जयेश घरा गेलो.
रातच्या 11 वरांच्या सुमाराक जयेश मेरशे कुशीक जखमी अवस्थेंत दिसून आयलो. पुलिसांनी घडणूक थळार धांव घेतली तेन्ना ताचे दोनूय पांय चिडिल्ल्याचे अवस्थेंत दिसले.
मजगतीं, जखमी अवस्थेंत जयेशाक गोंय वैजकी म्हाविद्यालयांत दाखल केलो, पूण उपचार सुरू आसतनाच ताका मरण आयलें.
जयेशाच्या गुढ मरणान ताच्या पुराय कुटुंबाक खर धपको बसला. ताका न्याय मेळोवन दिवपा खातीर खुनाचो गुन्यांव नोंद करून चवकशी करपाची मागणी तांणी केल्या. ह्या प्रकरणाची चवकशी पोरणें गोंयचे पुलीस निरिक्षक सतीश पडवळकार हांच्या मार्गदर्शना खाला बायल उपनिरिक्षक वॅरोनिका कुतिन्हो करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
