भांगरभूंय | प्रतिनिधी
बादें, आसगांव, कळंगूट, हणजूणें हांगाच्या 9 जाग्यांक दिली भेट
म्हापशें: जमीन हडप प्रकरणाची चवकशी आयुक्त गोंय खंडपिठाचे निवृत्त न्यायमुर्ती व्ही. के. जाधव हांणी आसगांव, बादें, हणजूण, कळंगूट हांगासरल्या वट्ट णव जाग्यांची पळोवणी करून पुलीस अधिकाऱ्यां कडल्यान म्हायती मेळयली.
गोंय सरकारान गोंयांतल्या ह्या जमीन हडप घोटाळ्याचे चवकशे खातीर फाटल्या 9 सप्टेंबर 2022 दिसा निवृत्त न्यायमुर्ती व्ही. के. जाधव हांची एक वांगडी आयुक्त म्हूण नेमणूक केल्ली. बिरेस्तारा बार्देस म्हालांतल्या वयल्या चार गांवांतली बळकायिल्ल्या 9 जाग्यांक भेट दिवन तांणी पळोवणी केली.
ह्या वेळार विशेश चवकशी पंगडाचे (एसआयटी) पुलीस अधिक्षक निधीन वाल्सन, उपअधिक्षक संतोष देसाय, निरिक्षक सुरज सामंत, सखाराम परब, उपनिरिक्षक योगेश गडकार, प्रितेश मडगांवकार आनी पुलीस पंगड आयुक्ता बरोबर आशिल्ले.
एसआयटीन जमीन हडप प्रकरणांत वट्ट 46 गुन्यांव नोंद केल्यात आनी हातूंतले 44 गुन्यांव हे बार्देस म्हालांत घडल्यात. तशेंच बार्देस म्हालांतले 51 जागे बळकायल्यात. तातूंतले चडशे जागे बादें आनी आसगांव ह्या दोन गांवांत आसात. जाल्यार कांय जागे कळंगूट आनी हणजूणें ह्या गांवांतले आसात.
आसगांवच्या लोकांनी जमीन हडप प्रकरणांत आवाज काडले उपरांत सरकारान ह्या प्रकरणाचे चवकशे खातीर विशेश चवकशी पंगडाची नेमणूक केल्ली. ह्या पंगडान आतां मेरेन 26 जाणांक अटक केल्या.
बिरेस्तारा आयुक्तांनी बादें आनी आसगांवां पांच जागे जाल्यार कळंगूटे आनी हणजूण्यां दरेकी दोन जाग्यांची पळोवणी केली. ह्या 9 जाग्यांतल्या कांय जाग्यांनी बांदकामां हातांत घेतिल्लीं दिसून आयलीं. ह्या बांदकामाचें काम एसआयटीन गुन्यांव दाखल जातकूच बंद उडयलां. सकाळीं आयुक्त जाधवन हांणी बादें आनी आसगांवांतल्या पांच जाग्यांक भेट दिवन पळोवणी केली. जाल्यार दनपारां कळंगूटे आनी हणजूण्यां चार जाग्यांची पळोवणी करून निरिक्षण नोंद केलें.
ह्या णव जाग्यां मदीं कांय जमनी वळखीच्यो जाल्यार कांय अनवळखीच्यो आसात. हातूंतल्या चार जाग्यांचेर बांदकाम अर्दकुटें स्थितींत आसून कांय जागे पडीक आसात. जाल्यार एक कडेन पुर्तुगेज काळांतले घरूच हडप केलां.
जमीन हडप प्रकरणांतले उपनिरिक्षक योगेश गडकार हे एसआयटी तपास पंगडाचे एक समर्पीत अधिकारी आसात. पळोवणे वेळार आयुक्तांनी विचारिल्ल्या प्रस्नांक तांणी कसलींच कागदपत्रां वा छापील नोंदणीची मजत घेनासतना फटाफट जापो दिल्यो. गडकार हांकां सगल्या प्लॉटांचें सर्वे क्रमांक तशेंच संबंदितांचीं नांवां तोंडपाठ आशिल्ल्याचें पळोवन आयुक्तांनी तांची तोखणाय केली. तशेंच गडकार हांचे फाटीर तोखणायेची थाप मारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
