भांगरभूंय | प्रतिनिधी
दलाय लामा : चीन आतां बदलता खंय
भांगरभूंय । खबरां संस्था
कांगडा : चीना कडेन उलोवणी करपाक आपूण तयार आसा अशें तिबेटी आध्यात्मिक फुडारी दलाय लामान सांगलें. चीन आतां बदलता. तिबेट प्रस्नाचेर उपाय काडपा खातीर कोण म्हाका मेळपाक सोदता जाल्यार ते येवंक शकतात. आमकां पुराय स्वातंत्र्य नाका. जायत्या वर्सां आदीं आमी चीनाचो एक भाग म्हूण रावपाचें थारायिल्लें. आतां तिबेटी लोकांची भावना खूब बळिश्ट आसा हें चीनाक लेगीत कळ्ळां.
म्हयनोभर लडाखाचे भोंवडेर भायर सरिल्ले दलाय लामा हिमाचल प्रदेशांतल्या कांगडा विमानतळार पत्रकारां कडेन उलयताले.
तांच्या अनुयायांनी दलाय लामां हांची भेट घेवपाक गर्दी केल्ली.
चीनाक म्हाका राग ना - दलाय लामा
तांणी म्हणलें, म्हाका कोणाचेरूय राग येना, तिबेटा विशीं खर भुमिका घेतिल्ल्या चीनी फुडाऱ्यांचो लेगीत राग ना. खरेंच चीन हो इतिहासीक नदरेन बौद्ध देश. चीनाक भेट दितना म्हाका जायतीं देवळां आनी मठ दिसले.
तांणी म्हणलें, तिबेटी संस्कृतायेक आनी धर्माक संवसाराक फायदो जावंक शकता अशें गिन्यान आसा अशें म्हाका दिसता. पूण हेर सगळ्या धर्मीक परंपरांक हांव मान दितां, कारण तीं आपल्या अनुयायांक मोगान आनी करुणेन जगपाक प्रोत्साहन दितात. हांव चीनाक वचपाचो प्रस्नूच ना. भारत हो सगल्यांत बरो देश. हांव हांगाच रावतलों.
म्हणल्यार म्हज्या स्वताच्या सपनांतल्या चिन्नां प्रमाण आनी हेर अदमासा प्रमाण हांवें 100 वर्सां वयर जियेवपाची अपेक्षा दवरल्या. हांवें सदांच दुसऱ्यांची सेवा केल्या आनी करतलों. त्या आदाराचेर म्हज्या लांब आयुश्या खातीर मागणें करात.
बौद्ध भिख्खूंच्यो रांको
मॅकलॉडगंज सोडून कांगरा विमानतळार वतना तिबेटी निर्वासितांनी रस्त्या कुशीक उबे रावून धर्मगुरूक सलामी दिली. निर्वासित तिबेटी लोकांक बौद्ध अनुयायींक लडाखांत वच्चे पयलीं दलाय लामाक पळोवपाची इत्सा आशिल्ली, देखून पावस पडलो तरी रस्त्यांचेर लोकांची गर्दी आशिल्ली.
विशेश म्हणल्यार, दलाय लामा सत्य आनी अहिंसेचो मार्ग आपणावन तिबेटी समस्या सोडोवपाचो यत्न करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
