चिंबला पार्किंगेच्या कारणा वयल्यान झगडीं जावन एकल्याक गूढ मरण

भांगरभूंय | प्रतिनिधी

दोगां दुबावितांक अटक; एकलो आयआरबी पुलीस

पणजी: बुधवारा रातीं सुमार आठ वरांचेर चिंबल जंक्शनार वाहन पार्किंगेच्या कारणा वयल्यान दोगां मदीं झगडीं जालीं. झगडीं करप्यां मदीं टॅक्सी चालक जयेश चोडणकार (42, चिंचवाडो, चिंबल) हो मेरशे रस्त्या कुशीक जखमी अवस्थेंत सांपडलो. ताचे दोनूय पांय चिड्डिल्ले. उपचारा खातीर ताका बांबोळे गोंय वैजकी म्हाविद्यालयांत दाखल केल्लो. पूण उपचार सुरू आसतनाच बिरेस्तारा सकाळीं ताका मरण आयलें. हाका लागून हो अपघात काय घातपात हाचो सोद पोरणें गोंय पुलिसांनी सुरू केला. ह्या प्रकरणांत कृपेश वळवयकार (बिठ्ठोण) आनी आयआरबीचो पुलीस प्रितेश हडकोणकार (चिंबल) हांकां अटक केल्या.
चिंबला एके सुवातेर बुधवारा रातीं 8 वरांच्या सुमाराक जयेश चोडणकार आपलें वाहन पार्क करतालो. हेच सुवातेंत सद्दां एक खाजगी बस पार्क करतात. त्या बस चालकाचो आनी जयेशाचो पार्किंगे वयल्यान वाद जालो. हे दोगूय एकामेकांचे वळखीचे. हो वाद सोंपले उपरांत रातीं उसरां बस चालक आनी ताच्या सोयर्‍यांनी जयेशाक आपोवन माफी मागपाक सांगलें. पूण थंय लेगीत तांचे मदीं वाद जालो. थंय जयेशाक मारपेट केल्ल्याचें समजता. उपरांत जयेश घरा गेलो.
रातच्या 11 वरांच्या सुमाराक जयेश मेरशे कुशीक जखमी अवस्थेंत दिसून आयलो. पुलिसांनी घडणूक थळार धांव घेतली तेन्ना ताचे दोनूय पांय चिड्डिल्लेे स्थितींत दिसले. मजगतीं, जखमी अवस्थेंत जयेशाक गोंय वैजकी म्हाविद्यालयांत दाखल केलो, पूण उपचार सुरू आसतनाच बिरेस्तारा सकाळीं ताका मरण आयलें.
वयले घडणुके उपरांत थळाव्यां मदीं तिडकीचें ल्हार पातळ्ळें. हो अपघात नासून घातपात आसा असो आरोप तांणी केलो. घडणुके उपरांत पुलिसांनी ‘हीट अ‍ॅण्ड रन’ आनी झगडीं जावन मारपेट केल्ल्या प्रकरणांत दोन वेगळेवेगळे गुन्यांव नोंद केल्यात. तशेंच मारपेट केल्ल्या प्रकरणांत दोगांक अटक केल्या.
हातूंतलो एकलो दुबावीत प्रितेश हडकोणकार हो भारतीय रिझर्व्ह बटालियनाचो (आयआरबी) पुलीस आसा. तेच बरोबर मेरशी वाठारांतली सीसीटीव्हीची मुळावी पळोवणी करतकूच तीन वाहनां रातीं ह्या वाठारांतल्यान गेल्ल्याचें दिसून आयलें. तांचो सोद पुलीस घेतात.
ह्या प्रकरणाची फुडली चवकशी पोरणें गोंयचे पुलीस निरिक्षक सतीश पडवळकार हांच्या मार्गदर्शना खाला बायल उपनिरिक्षक वॅरोनिका कुतिन्हो करतात.