चरावण्यां धरण बांदपाच्या प्रस्तावाक मान्यताय
भांगरभूंय | प्रतिनिधी
पणजी ः सत्तरीच्या ठाणे पंचायत वाठारांतल्या चरवणें हांगाच्या म्हादय अभयारण्य वाठारांत धरण बांदपाच्या प्रस्तावाक राना खात्यान मान्यताय दिल्या. ह्या धरणा वांगडाच आनीक तीन बांदांची बुन्याद डिसेंबर 2023 च्या निमाणे मेरेन पुराय जातली अशें उदका स्रोत मंत्री सुभाष शिरोडकार हांणी आयज विधानसभेच्या वेळार सभाघरांत जाहीर केलें.
बुधवारा विधानसभेच्या पावसाळी अधिवेशनांत मंत्री शिरोडकार प्रस्न काळांच्या वेळार उलयताले. फुडल्या वर्सा आमी उदका नियोजन, नवे धरण आनी बांद बांदपाचेर काम करतले अशेंय तांणी ह्या वेळार सांगलें. हो मुद्दो आमदार व्हेंझी व्हिएगसान मांडलो.
राज्यांत उदकाचो उणाव आशिल्ल्यान उदक सांठोवपा खातीर चडांत चड बांद बांदपाची गरज आसा. ते खातीर उदका स्रोत खात्यान डिसेंबर 2024 मेरेन आनीक शंबर बांद बांदपाचो निर्णय घेतला. उदका स्त्रोत खात्यान चरवणें धरणाचो प्रस्ताव वन्यजीव मंडळाक धाडिल्लो. ताका मंडळान मान्यताय दिल्या. देखून चरवणें आनी हेर तीन बांदांची बुन्याद डिसेंबराच्या निमाणे मेरेन घालतले अशें मंत्री शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
