भांगरभूंय | प्रतिनिधी
श्रीहरीकोटा : भारतीय अंतरिक्ष संशोधन संघटना 13 जुलयाक चांद्रयान- 3 लाँच करपाची शक्यताय आसा. ताची तयारी पुराय जाल्या. चंद्रयान- 3 ची एन्कॅप्स्युलेटेड असेंबली बुधवारा श्रीहरिकोटा हांगा सतीश धवन अंतरिक्ष केंद्रांत एलव्हीएम 3 कडेन जोडल्ली. इस्रो व्हिडियो ट्विट करून हे विशीं म्हायती दिल्या. चंद्रयान- 3 मिशनाक येस मेळ्ळें जाल्यार ह्या मळार भारत चवथो देश थारतलो. हाचे आदीं अमेरिका, रशिया आनी चीनान आपलें अंतरिक्षयान चंद्राचेर धाडलां.
चंद्रयान-2 मिशन 22 जुलय 2019 दिसा सुरू केल्लें. सुमार 2 म्हयन्यां उपरांत 7 सप्टेंबर 2019 दिसा विक्रम लँडर चंद्राच्या दक्षीण ध्रुवाचेर देंवपाचो यत्न करतना ताका अपेस आयले. तेन्ना सावन भारतान चंद्रयान- 3 मिशनाची तयारी सुरु केली. इस्रोन हें अंतरिक्षयान चंद्राचेर व्हरपा खातीर तीन भाग तयार केल्यात तंत्रीक नदरेन ताका मॉड्यूल अशें म्हण्टात. चंद्रयान- 3 मिशनांत मॉड्यूलाचे 3 भाग आसात.
जमनीच्या मुळाव्या साधनसुविधांचेर अतिरिक्त तपासणी पुराय जावंक नाशिल्ल्यान रशियेन आपलें मून लँडर मिशन फुडें धुकल्लें. हाचे आदीं तंत्रीक अडचणींक लागून रशियेचें मिशन 2022 वर्सा स्थगीत केल्लें. अशे परिस्थितींत भारताच्या चंद्रयान-3 मिशनाक रशिये पयलीं चंद्राचेर देंवपाची संद मेळटा.
इसरोच्या मुखेल्यान म्हणलें,
चंद्रयान- 2 मिशनांत आमकां अपेस आयले, अशें इस्रोचो मुखेल एस. सोमनाथान सांगलें. दर खेपे आमी अपेस जातलेच अशें ना, पूण तातूंतल्यान शिकून मुखार वचप म्हत्वाचें. चंद्रयान- 3 मिशनांतल्यान आमी खूब कितें शिकतले आनी इतिहास घडयतले.
चांद्रयान -3
इस्रोक चंद्रयान मिशनांतल्यान चंद्राचेर अभ्यास करपाची इत्सा आसा. भारतान 2008 वर्सा चंद्रयान- 1 हें येसस्वीपणान लाँच केले. हाचे उपरांत भारताक 2019 वर्सा चंद्रयान- 2 प्रक्षेपणांत अपेस आयलें. आतां भारत चंद्रयान- 3 प्रक्षेपण करून इतिहास निर्माण करपाचो यत्न करता. श्रीहरिकोटा सतीश धवन अंतरिक्ष केंद्रांतल्यान प्रक्षेपण करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
