घसघश्यांचेर वचपाक बंदी

भांगरभूंय | प्रतिनिधी

गेल्यार गुन्यांव नोंद करतले : विश्वजीत राणे

पणजी : सद्याचे दीस हे पावसाचे. पावसाक लागून न्हंयो तशेंच घसघशे वेगान व्हांवतात. उदकाची झोत पेंवपी मनशाक पसून बुडोवंक शकता. कांय लोक सोरो, बियरी पियेवन घसघश्यांचेर मस्ती करतात तर कांय लोकांक उदकांचो अदमास येना आनी तांकां बुडून मरण येता.
रानां मंत्री विश्वजीत राणे हांणी आयज सावन घसघश्यांचेर सोरो घेवन वचपी लोकांचेर खर कारवाय करतले, अशी शिटकावणी दिल्या. ह्या दिसांनी आमी घसघश्यांचेर वचपाक बंदी घाल्या. तरी लेगीत लिपचोरयां घसघश्यांचेर वचपी लोकांचेर गुन्यांव नोंद जातलो. दरेका घसघश्यांचेर फकत थारावीक संख्येन लोकांक वचपाची परवानगी दिवपा संबंदीची आमी येवजण आंखतात. घसघश्यांचेर वचपी आनी परत येवपी लोकांचो डेटाय दवरतले. थंय सुरक्षा रक्षकूय दवरपाचो विचार चल्ला, अशें तांणी सांगलें.
फाटल्या कांय दिसांनी 9 लोकांक बुडून मरण आयलां. रानां खात्याच्या दुर्लक्षाक लागून हें जालां अशें दिसना. पूण, अशें जाला जाल्यार यंत्रणा जाग्यार घालपाची गरज आसा. खात्याक हांवें हे विशींचें मूल्यमापन करपाचे आदेश दिल्यात आनी सरकारा कडल्यान थळाव्या पंचायतींक कितेंय जाय जाल्यार आमी सदांच मजत करपाक आसात, अशें राणे हांणी सांगलें.
रानां खात्याच्या दुर्लक्षाक लागून मैनापी घसघश्याचेर दोगांक बुडून मरण आयलें, अशें सुभाष फळदेसाय हांणी सांगलें. रान खातें हांगां 100 रुपया प्रवेश शुल्क घेता, पूण तें लायफ जॅकेट, चेंजींग रूम वा वॉशरूम अशें कसल्योच सुविधा दिना, अशेंय तांणी म्हणलें.