भांगरभूंय | प्रतिनिधी
पणजी : गोंय विधानसभेचें शिंयाळें अधिवेशन 16 जानेवारीच्यान सुरू जातलें. 16 जानेवारी ते 19 जानेवारी अशे चार दीस हें अधिवेशन चलतलें. अधिवेशनाची म्हायती दिवपी बातमीपत्र जारी जालां.
विधानसभेचें शिंयाळें अधिवेशन जानेवारींत जातलें, अशें सभापती रमेश तवडकार हांणी स्पश्ट केल्लें. ते प्रमाण आतां अधिवेशनाच्याे तारखो निश्चीत जाल्यात. दोन अधिवेशनां मदीं 6 म्हयन्यां परस चड कालावधी आसूंक जायना. स म्हयन्यां भितर विधानसभेचें अधिवेशन जावपाक जाय. पावसाळी अधिवेशन जुलयांत जाल्लें. स म्हयन्याचो कालावधी जानेवारींत सोंपता. हाका लागून जानेवारी सोंपचे पयलीं हें अधिवेशन जातलें.
नव्या वर्साचें हें पयलेंच अधिवेशन आशिल्ल्या कारणान राज्यपाल पी. एस. श्रीधरन पिल्लई हे पयल्या दिसा अभिभाशण करतले. अधिवेशनाची पुराय कार्यावळ अजून थारपाची आसा. कामकाज सल्लागार मंडळाचे बसकेंत अधिवेशनाची कार्यावळ थारतली. पावसाळी अधिवेशनाचो कालावधी चड दिसांचो आशिल्लो.
पंचायतींचो कार्यकाळ सोंपिल्यान पंचायतींच्यो वेंचणुको घेवपाचो आदेश खंडपिठान दिलो. हाका लागून ऑगस्टांत सरकाराक पंचायत वेंचणूक घेवची पडली. वेंचणूक आचारसंहितेक लागून अधिवेशनाचो कालावधी उणो करचो पडलो. अधिवेशनाचो कालावधी उणो करपा खातीर विरोधकांनी सरकाराचेर टिका केल्ली. शिंयाळें अधिवेशना उपरांत फेब्रुवारी वा मार्चांत अर्थसंकल्पी अधिवेशन जातलें.
विधानसभेचें शिंयाळें अधिवेशन चार दीस घेत आशिल्ल्याच्या कारणा वयल्यान विरोधी कॉंग्रेस आनी गोवा फॉरवर्डान सरकाराचेर टिका केल्या. सत्ताधाऱ्यांक विधानसभेंत लोकांच्या प्रस्नांचेर चर्चाच करपाची ना. ताका लागून अधिवेशनाचे दीस उणे केल्यात अशी टिका विरोधी पक्ष फुडारी युरी आलेमांव आनी गोवा फॉरवर्डाचे आमदार विजय सरदेसाय हांणी काल (बिरेस्तारा) केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
