भांगरभूंय | प्रतिनिधी
वीज पुरवणेंत हाडटले सुसुत्रताय; 390 कोटींचीं कामां आसात सुरू
कळंगूटे वीज उपकेंद्राचें लोकार्पण
म्हापशें: गोंयांत वीज पुरणेंत सुसुत्रताय हाडपाचो यत्न वीज खातें करता. ते फाटभुंयेर 890 कोटींची कामां हातांत घेतल्यांत आनी तातूंतलीं 390 कोटींचीं कामां सुरू आसात. जाल्यार 350 कोटींच्या साळगांव वीज केंद्रा सयत येता त्या तीन म्हयन्यांत अजून 150 कोटींचीं कामां सुरू करतले अशी घोशणा वीज मंत्री सुदिन ढवळीकार हांणी केली.
कळंगूटे साडेपंचवीस कोटी रुपया खर्च करून उबारिल्ल्या गॅस इन्सुलेटर वीज उपकेंद्राचें लोकार्पण केले उपरांत मंत्री ढवळीकार उलयताले. ह्या वेळार आमदार मायकल लोबो, सरपंच जोजफ सिक्वेरा, उपसरपंच गीता परब, जि.पं. वांगडी दत्तप्रसाद दाभोळकार, आदले अभियंतो अॅलन लोबो, मुख्य अभियंतो स्टेफन फर्नांडीस, अधिक्षक अभियंतो मयूर हेदे आनी कार्यकारी अभियंतो प्रदीप नार्वेंकार हाजीर आशिल्ले.
कळंगूट वाठारांत लोड शेडिंगेची समस्या आशिल्ली. 15 मॅगावॅट वीज पुरवण कमी पडटाली. ह्या केंद्राक लागून लोकांक सुरळीत वीज पुरवण जातली. तशेंच थिवी वीज केंद्राचें विस्तारीकरण सुरू आसा. उपरांत वीज समस्या थोडीभोव सुरळीत जातली. सगल्यांक समान सुविधा दिवप हें आपलें लक्ष्य आसा. तशेंच चोरून वीज वापरपूय बंद जावंक जाय. लोकांनी सौर म्हणल्यार ग्रीन इनर्जी कडेन वळूंक जाय. सरकारान दिल्ल्या आस्वासनाची अंमलबजावणी करप हेंच आपलें ध्येय आसून ह्या उद्दिश्टांचेर वीज खात्याचो कारभार सुरू आसा अशें मंत्री ढवळीकारान सांगलें.
कळंगूटे मलनिस्सारण प्रकल्प सुरू करपाक लोकांनी सहकार्य केल्यार घाण उदकाची समस्या पयस जातली. 2004 वर्सा गोंयांत घाण उदकाचेर उपाय काडपा खातीर आपणे जायका ही संस्था हाडली. हे संस्थेच्या माध्यमांतल्यान पणजेंतल्या सिटेक ऑस्ट्रेलियन टेक्नॉलोजीयुक्त प्रकल्प उबारला. उपरांत ह्या तंत्रज्ञानाचे आशिया खंडांत 2 हजार प्रकल्प उबे जाले. गिरी म्हापश्यां नियोजीत 20 एमएलडी उदका प्रकल्प उबारल्यार कळंगूटचो आनी साळगांवचो उदकाचो प्रस्न सुट्टलो अशेंय मंत्री ढवळीकारान सांगलें.
आमदार मायकल लोबोन म्हणलें, हांव 2012 वर्सा आमदार जालों तेन्ना कळंगूटे कोयर, उदक, वीज ह्यो व्हड समस्या आशिल्ल्यो. त्यावेळार आमी संवसारीक दर्जाचो घनकोयर प्रकल्प उबारलो. वीज समस्या जटील जायत चलिल्ली. पूण सरकारा कडेन सुवात नाशिल्ली. वीज खात्याचे निवृत्त अधिकारी अॅलन पिंटो हांणी उण्या मोलांत सुवात दिल्ल्यान हें वीज केंद्र उबें जालें. ताका लागून पिंटो आनी तांच्या कुटुंबाचे आमी उपकारी आसात. साळगांवचे मुख्य नियोजीत केंद्र सुरू जालें जाल्यार बार्देस म्हालांतली विजेची समस्या सुटावी जातली.
वीज खात्याचे मुखेल अभियंतो स्टीफन फर्नांडीस हांणी येवकार दिलो. लोकांक सुरळीत वीज पुरवण दिवप हें आमचे कर्तव्य आसून ते नदरेन आमी कार्यरत आसात. फुडारांत विकास कामांक लोकांनी सहकार्य करचें अशें आवाहन तांणी केलें. कार्यकारी अभियंतो प्रदीप नार्वेंकार हांणी उपकार मानले.
गोंयांत वीज चोरी व्हड प्रमाणांत जायत आसा. वीज चोरयेची टक्केवारी 14 आनी 12 टक्के हाडपाक खात्याक येस आयलां. पूण हे चोरयेचेर कायमचो उपाय म्हूण स्मार्ट वीज मिटर बसोवपाचो निर्णय वीज खात्यान घेतला. वीज चोरयेक लागून महसुलांत उणाव येता. येता त्या स म्हयन्यां भितर वीज चोरयेचें प्रमाण 9 टक्के मेरेन हाडून लुकसाण टाळपाचें आमचें उद्दिश्ट आसा अशें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
