भांगरभूंय | प्रतिनिधी
मराठी परस कोंकणी लेखक, पुस्तकांचो आंकडो चड
पणजी: गोंयांत वर्साक शंबरेक लेखकांची लागीं लागीं 200 पुस्तकां तयार जातात, अशी म्हायती लेखक तशेंच प्रकाशकां कडल्यान मेळ्ळी. मराठी परस कोंकणी लेखक तशेंच प्रकाशीत जावपी पुस्तकांचो आंकडो चड आसा. कोंकणीत वर्साक सुमार 125 ते 150 जाल्यार मराठीत 50 ते 75 पुस्तकां सहज प्रकाशीत जातात. कोंकणी, मराठीत मेळून शंबरेक लेखकांची वर्साक पुस्तकां येतात. हो आंकडो हयात आशिल्ल्या लेखकांचो आसा.
दर्जेदार कादंबऱ्यो दर वर्सा तयार जायत नासल्यो तरी कथा संग्रह, कविता संग्रह, प्रवास वर्णनां, पुस्तक परिक्षण आनी अणकाराचीं पुस्तकां प्रकाशीत जातात. ह्या पुस्तकांतल्यो कांय कथा, कविता तशेंच लेख हांचो आस्पाव कोंकणी वा मराठी पाठ्यपुस्तकांत करपाक हरकत ना. धड्याच्या स्वरुपात पुस्तकांत आस्पाव करपा इतलो दर्जो ह्या पुस्तकांचो नक्कीच आसा, अशें मत मराठी लेख रामदास केळकार हांणी उक्तायलें. म्हजीं 41 पुस्तकां प्रकाशीत जाल्यांत. कांय पुस्तकांक पुरस्कार फावो जाल्यात, अशें तांणी सांगलें.
हांव वर्साक पन्नाशेक पुस्तकां प्रकाशीत करतां. हातूंत चड मराठी पुस्तकां आसतात, अशें जागर प्रकाशनाचे सुदेश आर्लेकार हांणी सांगलें. हांव वर्साक पंचविशेक पुस्तकां प्रकाशीत करतां. हातूंत चडशीं पुस्तकां कोंकणी आसतात, अशें संजना पब्लिकेशनाचे दिनेश मणेरकार हांणी सांगलें.
गोंयांत कोंकणी तशेंच मराठीत दर वर्सा पुस्तकां प्रकाशीत जातात. हाचे पैकीं कथा, कविता, यादीं ह्या प्रकारचीं बरींच पुस्तकां आसात. कोंकणी वा मराठी पाठ्यपुस्तकांत आस्पाव करपा इतल्या दर्जाचें हें साहित्य नक्कीच आसा, अशें लेखक आनी प्राध्यापक डॉ. प्रकाश वजरीकार हांणी सांगलें. पाठ्यपुस्तकांत आस्पावीत साहित्य हें ज्ञानपीठ व साहित्य अकादेमी पुरस्काराच्याच दर्ज्याचें आसपाक जाय अशें ना, अशेंय तांणी म्हणलें.
गोंयांत गोवा कोंकणी अकादेमी, कोंकणी भाशा मंडळ, गोवा मराठी अकादमी (सरकारी), गोमंतक मराठी अकादमी, साहित्य सेवक मंडळ, इन्स्टिट्यूट मिनेझीस ब्रागांझा ह्यो संस्था कोंकणी, मराठी भाशे खातीर वावर करतात. तरेकवार अकादमी खातीर वट्ट 7 कोटींची तजवीज अर्थसंकल्पात आसा. कोंकणी अकादेमी कोंकणी पुस्तकां खातीर अनुदान दिता. मराठी अकादमी मराठी पुस्तकां खातीर अनुदान दिता. वर्सागणीक 10 लाखां वयर खर्च पुस्तक प्रकाशनाच्या अनुदानाचेर जाता. ते भायर पुस्तकांक पुरस्कार दिवपी भाशा पुरस्कार येवजण आसा. अंदूं सरकारान फाटल्या वर्सा प्रलंबीत आशिल्ले सगले पुरस्कार दिल्यात.
गोंयांत कोंकणी तशेंच मराठी भाशेंत पुस्तकां बरोवपी लेखक आसात. दरवर्सां पुस्तकां प्रकाशीत जातात. गरज पडल्यार पाठ्यपुस्तक तयार करपी अभ्यास मंडळ वा संपादक मंडळ आवश्यकते प्रमाण एखाद्या लेखका कडल्यान अपेक्षे प्रमाण धडो बरोवन लेगीत घेवंक शकता. हाका लागून पाठ्यपुस्तकांत गोंयच्या लेखकांक संद दिवप वा तांच्या धड्याचो आस्पाव करप हें अशक्य ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
