भांगरभूंय | प्रतिनिधी
महाराष्ट्रांतल्या पांच जाणांक अटक
म्हापशें ः कांदोळेच्या उदय गोल्डस्मिथ ज्वेलरी शॉप ह्या दुकानांतल्यान २२ लाख रूपयांच्यो १६ मुदयो चोरपी महाराष्ट्रांतल्या पांच जाणांचे टोळयेक कळंगूटे पुलिसांनी वट्ट ३६ वरांनीच अटक केली. सीसीटीव्ही फुटेजीच्या आदारार पुलिसांक ह्या चोरांक धरप शक्य जालें. चांदीचीं पायांतलीं विकत घेवपाचीं नाटकां करून हे टोळयेन ही चोरी केली. हे टोळयेक ह्यान पयलीं उत्तराखंड आनी लखनऊ (उत्तरप्रदेश) हांगा अटक जाल्ली.
पांडुरंग गणपत पवार (७६, रा. खर्नाळे, महाड-महाराष्ट्र), मंगेश भाऊ सुर्वे (३५, रा. खर्नाळे, महाड) सतीश नामदेव शिंदे (४१, रा. खर्नाळे, महाड), जोशना आनंद पवार (६५, रा. खर्नाळे, महाड), आनी विमल राजेंद्र जाधव, (६१, रा. सातारा) अशीं ह्या दुबावितांचीं नांवां आसात.
ही चोरयेची घडणूक शुक्रार २६ तारखेर दनपारच्या सुमार १२.३० वरांचेर घडिल्ली. ह्या प्रकरणांत दुकान धनी उदय शिरोडकार हांणी पुलिशेंत कागाळ केल्ली. वयले घडणुकेच्या वेळार दुबावीत आरोपी कागाळदाराच्या दुकानांत रुप्याचीं पांयांतली घेवपाच्या नांवान गिराय जावन दुकानांत आयिल्लीं.तिगां दादल्यांनी दुकानदाराक पांयांतलीं दाखोवपाक व्यस्त दवरलें. जाल्यार दोनां मदले एके बायलेन दुकानांतले ग्लासाचे शोकेसींतल्यान मुदयांनी भरिल्लें एक आनी दुसरे बायलेच्या पोतयेंत घालें. उपरांत सगळे दुबावीत दुकानांतल्यान पळून गेले.
कांय वेळान कागाळदाराक १६ मुदयांचें रॅक शोकेसींतल्यान गायब आशिल्ल्याचें दिसून आयलें. तांणी सीसीटीव्ही फुटेज तपासली. तेन्ना हो चोरयेचो प्रकार समजलो. रोखडीच तांणी हळंगुटे पुलिशेंत कागाळ केली.
दुबावितांक धरपा खातीर कळंगुटे पुलिसांनी रोखडोच एक विशेश तपास पंगड स्थापन केलो आनी तांत्रीक निरीक्षण आनी समन्वित कारवायेच्या आदारार आरोपींची वळख पटली. उपरांत तांच्या हालचालींचो येसस्वीपणान पुलिसांनी फाटलाव केलो.
पुलीस तपासांत ही दुबावीत टोळी गोंयच्या महाराष्ट्रांतल्या रायगडचे दिकेन गेल्ल्याचें समजलें. ते प्रमाण कळंगुटे पुलिसांनी रायगड पुलिसांक सतर्क केले. लोर्णे- रायगडच्या एका हॉटलांत देंविल्ले हे टोळयेक थळाव्या पुलिसांनी धरली. उपरांत कळंगुटे पुलिसांनी दुबावीत टोळयेक ताब्यांत घेवन आयतारा २८ तारखेर गोंयांत हाडली आनी तांकां अटक केली. दुबावीत टोळये कडल्यान १६ मदल्यो १५ मुदयो पुलिसांनी जप्त केल्यात. जाल्यार एक मुदयेचो सोद चालू आसा.
पुलीस अधीक्षक विश्वेश कर्पे आनी निरीक्षक लक्षी आमोणकार हांच्या मार्गदर्शनाखाला उपनिरीक्षक परेश सिनारी, उपनिरीक्षक योगेश मांद्रेंकार, कॉन्सटेबल विजय नायक, राजेश कांदोळकार योगेश बोर्डेकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
