भांगरभूंय | प्रतिनिधी
केंद्र सरकारच्या अहवालांतल्यान म्हायती
पणजी : गोंयांत लाखांनी कुटुंबां गरिबीरेशे खाला (बीपीएल) आसात. पूण केंद्र सरकाराच्या प्रधानमंत्री उज्ज्वला येवजणेचो लाव फाटल्या स वर्सांत फक्त 1,147 कुुटुंबांकूच मेळिल्ल्याचे केंद्र सरकाराच्या एका अहवालांतल्यान उक्तें जालां.
ग्रामीण वाठारांतल्या गरीब बायलांक अर्थीक अडचणींक लागून गॅस कनेक्शन घेवप परवडना. तांकां चुलीचेर जेवण करचें पडटा. ताका लागून वायू प्रदूशण जावपा सयत तांचे भलायकेचेरूय परिणाम जाता. हे लक्षांत घेवन प्रधानमंत्री नरेंद्र मोदी हांणी 1 मे 2016 दिसा प्रधानमंत्री उज्ज्वला येवजणेची घोशणा करून देशभरांतल्या गरिबीरेशे खाला आशिल्ल्या कुटुंबांक गॅस कनेक्शना खातीर 1,600 रुपयांची अर्थीक मजत दिवपाचे तशेंच गॅस शेगडी खरेदी आनी पयल्या सिलेंडरा खातीर येवपी खर्च हप्त्यांनी फारीक करपाची सवलत दिली. ते उपरांत देशभरांतल्या गरिबीरेशे खाला आशिल्ल्या कुटुंबांनी हे येवजणेचो लाव घेवपाक सुरवात केली.
केंद्रा कडल्यान आतां मेरेन दोन टप्प्यांत हे येवजणेचो लाव लोकांक मेळोवन दिला. पयल्या टप्प्यांत गोंयांतल्या 1,081 आनी दुसऱ्या टप्प्यांत 1 डिसेंबर 2022 मेरेन 66 अशा 1,147 बीपीएल कुटुंबांनी येवजणेचो लाव घेतला, अशें अहवालांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
