भांगरभूंय | प्रतिनिधी
भलायकी मंत्र्यांचे लेखी जापेंत म्हायती उक्तीं
पणजी : गोंयांतल्या गोडेंमूताच्या दुयेंतींनी दिसानदीस वाड जायत आसा. फाटल्या दोन वर्सांच्या काळांत गोंयांत गोडेंमूताचे नवे 16873 दुयेंती सांपडल्यात. 2021-22 त 7,175 आनी 2022-23 त 9,698 नवे दुयेंती सांपडल्यात. हातूंत 2022-23 त दादल्यां परस बायलांची संख्या वाडल्या.
विधानसभेंत आमदार प्रवीण आर्लेकार हांणी विचारिल्ल्या अतारांकीत प्रस्नाचे लेखी जापेंत भलायकी मंत्री विश्वजीत राणे हांणी जी आंकडेवारी सादर केल्या, तातूंतल्यान ही म्हायती मुखार आयल्या.
एप्रील 2021 ते मार्च 2022 ह्या काळांत 3,713 दादले आनी 3,462 बायलां अशें मेळून 7,175 गोडेंमुताचे दुयेंती आशिल्ले. जाल्यार एप्रील 2022 ते मार्च 2023 ह्या काळांत गोडेंमूत आशिल्ल्या दादल्यांचो आंकडो 4,799 आनी बायलांचो आंकडो 4,899 जावन ह्या काळांत गोडेंमूताचे वट्ट 9,698 दुयेंती जाल्यात, अशें मंत्री राणे हांणी दिल्ल्या जापेंतल्यान दिसून येता.
गोंयकारांची जीणशैली दिसान दीस बदलत चल्ल्या. खावपा पिवपाच्या संवयींत बदल जाला. तातूंतल्यान जाडेपणा, उच्च रक्तदाब, डिसलीपिडेमिया सारकें दुयेंस वाडून तातूंतल्यान जायत्या जाणांक गोडेंमूताची लागण जाता, अशेंय जापेंत नमूद केलां.
मजगतीं, 30 ते 60 आनी 60 ते 80 ह्या दोन पिराय गटांतल्या गोडेंमुतांच्या दुयेंतींनी वाड जायत आशिल्ल्याचे मंत्री राणे हांणी पिराय गटा प्रमाण सादर केल्ल्या दुयेंतींच्या आंकडेवारींतल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
