भांगरभूंय | प्रतिनिधी
पांच वर्सांचो आंकडो
पणजी ः गोंयच्या लोकांनी फाटल्या पांच वर्सांत ५ हजार ९०५ कोटी आयकर भरला. सरासरी गोमंतकीय वर्सुकी १,११८ कोटी रुपया आयकर भरता. हो फकत पांच वर्सांचो आंकडो.
तातूंत जीएसटी वा गोंय वेवसायीक कर आसचोना. तो फकत गोंयांत करदात्यांनी भरिल्लो आयकर. ही म्हायती गोंयच्या मुखेल आयकर आयुक्ताच्या कार्यालयांतले उपआयुक्त इश गुप्तान आरटीआय अर्जांत दिली. २०१८-१९ ते २०२२-२३ ह्या अर्थीक वर्सांत गोंय राज्यांतल्यान लोकांनी ५,९०५ कोटी आयकर भरला.
पांच वर्सांत सगळ्यांत चड आयकर २०१८- १९ वर्सा वसूल केला. त्या वर्सा १,४०४ कोटी आयकर एकठांय जाल्लो, पूण उपरांत आयकराचो आंकडो उणो जायत गेलो. २०१९-२० वर्सा १,०९३.९० कोटी आनी २०२०- २१ वर्सा फकत ७२६.०१ कोटी रुपया जमा जाले. कोविडाच्या काळांत जायत्या लोकांच्यो नोकऱ्यो गेल्ल्यान त्या काळांत आयकराची वसुलीय उणी जाली.
२०२१- २२ वर्सा कोविड उणो जाले उपरांत आयकरांत परतून वाड जाली. ते खातीर १,२७८.४६ कोटी रुपया एकठांय जाले. उपरांत २०२२- २३ वर्सा येणावळ करांतल्यान १,३६७.५३ कोटी रुपया एकठांय जाले.
आयकरा खातीर गोंयचो आस्पाव कर्नाटक कर विभागांत जाता. ह्या आरटीआय अर्जांतल्यान स्पश्ट जाता की ह्या दोन राज्यांतल्यान मेळपी आयकराची येणावळ हजारांनी कोटी आसली तरी सरासरीन गोंयचो वाटो सुमार १,११८ कोटी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
