भांगरभूंय | प्रतिनिधी
मुख्यमंत्री: 22 वेर इतिहासीक सुवाळ्याचें व्हरच्युअल हाजीर रावन साक्षिदार जायात
दिवचल: खूबशीं वर्सां वाट पळोवन श्रीराम मंदीर साकारलां. अयोध्येंत जावपी श्रीराम प्राण प्रतिश्ठा सुवाळ्याचे साक्षिदार जावपा खातीर गांवांतल्या मुखेल देवळांनी एकठांय येवन व्हरच्युअल पद्दतीन सुवाळ्यांत वांटेकार जायात अशें आवाहन करतना, गोंयच्या लोकांक अयोध्येची यात्रा घडयतले अशें मुख्यमंत्री डॉ. प्रमोद सावंत हांणी सांगलें.
22 जानेवारीक अयोध्येंत जावपी प्रभू श्रीरामचंद्रांची प्रतिश्ठापणा निमंत्रण पत्रिका मुख्यमंत्री डॉ. सावंत हांचे हस्तुकीं शेंकड्यांनी भाविकांचे हाजिरेंत हरवळ्यां रुद्रेश्वर देवस्थानांत वचून दिली. ह्या वेळार तांणी आरती केली. हाजीर आशिल्ल्या भाविकांनी श्रीरामाचो जयजयकार केलो.
ह्या वेळार मुख्यमंत्री डॉ. सावंत हांणी खूबशा वर्सांचें सपन पुराय जालां. प्रधानमंत्री नरेंद्र मोदी हांणी हें फळादीक करपा खातीर म्हत्वाची भुमिका वठयतना हजारांनी भाविकांनी केल्लें कश्ट, दिल्लें बलिदान सार्थकी लागलां. ह्या इतिहासीक खिणाचे साक्षिदार जावपा खातीर गांवांगांवांत एकठांय येवन मुखेल देवळांनी उत्सव मनयात अशें आवाहन तांणी केलें. अयोध्येंत गोंयकार भाविकांक दर्शन घेवपा खातीर आमी विशेश यात्रा आयोजीत करूं अशेंय तांणी सांगलें.
1991 वर्सा प्रभू श्रीरामाच्यो पादुका तशेंच शिळा पुजनाची याद ताजी करतना आमच्या गांवांतल्या देवळांत पालखेंत सजयिल्ल्या आनी भाविकांचे उपस्थितींत पुजा अर्चा करून मनोभावान सेवा केल्ल्याची याद तांणी सांगली. त्या वेळार कांय लोक आमची फकांडां करताले हेंवूय तांणी सांगलें.
गांवांगांवांत लोकांनी एकठांय येवन सकाळ सावन जप साधना करची आनी सुवाळो सुरू जातकच ताचे साक्षिदार जावचे अशें आवाहन डॉ. प्रमोद सावंत हांणी केलें. ह्या वेळार देवस्थान समिती, विश्व हिंदू परिशदेचे कार्यकर्ते, भावीक हाजीर आशिल्ले. ह्या वेळार मुख्यमंत्र्यांनी रुद्रेश्वराक निमंत्रण दिलें आनी आरती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
