भांगरभूंय | प्रतिनिधी
पणजीः बेबिंका, मानकुराद, आगशेचें वायंगे आनी सात शिरांचो भेंडो ह्या गोंयच्या चार वस्तूंक जीआय मानांकन मेळ्ळें. ताका लागून जीआय मानंकन मेळिल्ल्या गोंयच्या वस्तूंची संख्या णवाचेर पावल्या. हे आदीं खालोची मिरसांग, हरमलची मिरसांग, काजू फेणी, मयंडोळी केळी आनी खाजें ह्या गोंयच्या पांच वस्तूंक जीआय मानांकन मेळ्ळां.
पेटंट डिझायन आनी ट्रेडमार्काचे नियंत्रक जनरल तशेंच जीआय निबंधक डॉ. उनीत पंडीत फाटल्या डिसेंबरांत गोंयांत आयिल्ले. त्या वेळार तांणी गोंयान जीआय मानांकना खातीर सादर केल्ल्या बेबिंका, मानकुराद, काजू, आगशीचें वायंगे आनी सातशिरांचो भेंडो ह्या पांचूय वस्तूंचें परिक्षण केल्लें. ते उपरांत तांणी विज्ञान- तंत्रज्ञान मंडळा कडल्यान हे विशींचो अहवाल मागयिल्लो. ते प्रमाण मंडळान जीआय निबंधकांक अहवाल लेगीत सादर केल्लो. जीआय निबंधकां कडल्यान मान्यताय मेळ्ळे उपरांत हो अहवाल हरकतीं खातीर 120 दीस उक्तो दवरिल्लो. ह्या काळांत गोंयचो काजू सोडून हेर चार वस्तूंक कोणेच हरकत घेवंक ना. ताका लागून ह्या चार वस्तूंक जीआय मानांकन मेळिल्ल्याचें निश्चीत जालां. जीआय निबंधकां कडल्यान फुडल्या दोन दिसांत हे विशींचो आदेश जारी जावपाक शकता, अशी म्हायती विज्ञान- तंत्रज्ञान मंडळाचे अधिकारी दीपक परब हांणी ‘भांगरभूंय’ कडेन उलयतना दिली.
जीआय मानांकन म्हणल्यार कितें?
एकादें उत्पादन विशिश्ट वाठारांतूच घेतात जाल्यार आनी त्या उत्पादनाक जर विशिश्ट वळख आसली जाल्यार ताका जीआय मानांकन दितात. खंयच्याय उत्पादनाक जीआय मानांकन मेळ्ळें जाल्यार त्या उत्पादनाचें उगमस्थान निश्चीत जाता. ते भायर फायदो तशेंच गुणवत्ता कायम दवरचे खातीर ताचो फायदो उत्पादकांक जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
