भांगरभूंय | प्रतिनिधी
ह्या गोंयकारांची अस्मिताय कायम उरची आनी तांचे गोंया कडलें नातें तुटचे न्ही हे खातीर अशा गोंयकारांक दोट्टी नागरिकत्वाचो लाव दिवचो
आतां पुर्तुगाल आनी भारत ह्या दोन देशां मदीं कसलीच कोडसाण उरूंक ना. दोनय देश एकामेकां कडेन खूब बरे संबंद जोडून चलतात. युनोत लेगींत पुर्तुगाल भारताच्या अनुकूल आसता. फाटल्या तेंपार कोणेंय ‘Viva Portugal’ म्हणीत जाल्यार ताका अराश्ट्रीय मानताले; पुर्तुगेजधार्जिणो समजताले. पुण आयज तशी स्थिती बिलकुल उरूंक ना. परस्पर संबंद आपुलकायेचे जाल्ले आसात.
तशें पळयत जाल्यार आशिया खंडातलो भारत आनी युरोपांतलो पुर्तुगाल हे दोनय देश भुगोलिक स्थितीन खूब पयस आसात. दर्या मार्गान साधारण 8000 ते 10,000 किलोमेत्र इतलें अंतर पयस. तरीय आसतना आयज ह्या दोन देशां मदीं भावनिक अंतर खूब लागीचें आसा. हाचे उरफाटें एकाच आशिया खंडातले भारत आनी पाकिस्तान सामके शेजाराक लागींच्या अंतराचेर आसून लेगीत मनान खूब पयस आसात. जिनाच्या भक्तांक बरे भशेन सुशेगाद रावुंदी म्हूणन तांकां काँग्रेसीन वेगळो पाकिस्तान देश करूंक दिलो. वयल्यान कितलेशेच कोटी रुपयांची मजत दिली. तरीय आसतना पाकिस्तान आजून मेरेन भारता कडे बरे संबंद दवरूंक तयार ना. हाचे उरफाटे पुर्तुगाल. एका तेंपार आमकां तांणी खूब दुखयिल्लें. पूण सालाझाराची हुकूमी राजवट सोंपत सावन तांणी भारता कडे खूब बरे संबंद जोडले. ते गोंय, दामाव आनी दीवच्या लोकांक आपलेशे मानतात. आदलीं कोडसाण आयज उरूंक नात. पुर्तुगाल आयज भारताचें एक इश्ट राश्ट्र जावन आसा.
मूळ गोंयकार अशे आयज असंख्य लोक पुर्तुगालाक स्थायिक जाल्यात. एक मडगांवकार मनीस प्रधानमंत्री लेगीत जावन गेला. ही आमकां अभिमानाची गजाल! मडगांवां जाका सगले ताचे लागींचे कोंकणी मनीस बाबुश म्हणटाले, तो आन्तोनीयु काॅश्ता हो एक गोंयकार समाजवादी राजकारणी. ताणें पुर्तुगालचो प्रधानमंत्री म्हूणन 2015 ते 2024 वर्स मेरेन पदभार सांबाळ्ळा. तांचो बापूय हो एक फाकीवंत गोंयकार लेखक जावन आशिल्लो.
आंतोनीयु काॅश्ताबाबांक प्रधानमंत्री नरेन्द्र मोदीन OCI (Overseas Citizen of India) असो भोवमान दिला.
परप्रांतीयांची गोंयांतले वाडटे गर्देंत गोंयकारांची सद्या कितें स्थिती जाल्या तें आनीक वेगळें कोणाक सांगपाची गरज ना. नोकरी आनी हेर सुविधांच्या आशेन गोंयकार भारतीय नागरिकत्व सोडून पुर्तुगेज नागरिकत्व घेवपाचे प्रकार व्हड संख्येन चालूच आसा. ह्या गोंयकारांची अस्मिताय कायम उरची आनी तांचे गोंया कडलें नातें तुटचे न्ही हे खातीर अशा गोंयकारांक दोट्टी नागरिकत्वाचो लाव दिवचो, अशें लोक मागतात.
जे कोण गोंय सोडून पुर्तुगालाक गेले ते तांची अर्थिक गरज आशिल्ली म्हणून. ते बरे खुशालभरीत जावन आनंदान गेले अशें केन्नाच आसचेंना. अर्थिक परिस्थितीतल्यान तांकां गोंय सोडचें पडलां.
पुर्तुगेज पासपोर्ट घेवून लंडनाक स्थायिक जाल्ल्या कितलेशाच जणांचीं मनां गोंयांतच भोंवत आसतात. देखून आपणाल्या गांवांत कसलीय परब, जात्रा वा फेस्त आसता तेन्ना सुटी घेवन कितलेच जाण गोंयां येतात. म्हणटकच तांकां तांची अस्मिताय राखूंक मेळची हे खातीर दोट्टी नागरिकत्वाचो लाव मेळप सामकें गरजेचें. आयज सगलो संवसार एकठांय येता आसतना लोकांक भौगोलिक शिमेंत बंद करुन दवरप सारकें दिसना.
भारतीय संविधाना प्रमाण आमी दोन देशांचे नागरिक आसूंक शकनात. पूण घटनेच्या 371 (1) चो आधार घेवन केन्द्र सरकार खंयच्याय राज्याक खास दर्जो दिवपाक शकता. हे तरतुदीचो वापर करून पुर्तुगाली गोंयकारांक दोट्टी नागरिकत्वाचो लाव मेळूंक शकता. पूण ते खातीर घटनेच्या ह्या कलमांत दुरुस्ती करून घेवची पडटली, अशें कायद्याचे जाणकार म्हण्टात.
सगलेच गोंयकार जर भायर वचूंक लागले आनी सद्याक जशें कितें घडटा तें घडत रावलें जाल्यार हें गोंय आनीक गोंयकारांचे उरचेंना. हें येन्नाच आमी वळखूंक जाय.
– पंढरीनाथ दामोदर लोटलीकार
मो. 9922233348
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
