भांगरभूंय | प्रतिनिधी
कागाळ करून लेगीत कंपनीची आडनदर
वाळपय: सत्तरी म्हालांतली बीएसएनएलची सेवा नागरिकां खातीर तकलीफोड थारल्या. म्हालांतल्या खूबशा सुवातींनी समाधानकारक सेवा मेळनाशिल्ल्यान बीएसएनएलाचीं गिरायकां बेजारल्यात. गुळेलींत बीएसएनएल सेवा फाटल्या तीन म्हयन्यां सावन ठप्प जाल्या. हाका लागून गिरायकांक समस्यांक तोंड दिवचें पडटा. खूबशे फावटी कागाळ करून लेगीत लक्ष दिनाशिल्ल्यान गिरायकांनी बीएसएनएलची सेवा बंद केल्या. फुडारांत सेवेंत सुदारणा जाली ना जाल्यार सेवा बंद दवरतले अशी शिटकावणी गिरायकांनी दिल्या.
मेळिल्ले म्हायती प्रमाण खाजगी कंपनीं आयले उपरांत बीएसएनएल सेवा दिवपाक अपेशी थारल्या. सत्तरी म्हालांतल्या खास करून गांवगिऱ्या वाठारांनी ही सेवा मेळटाली. पूण फाटल्या कांय म्हयन्यां सावन बीएसएनएलाची सेवा पुरायपणान ठप्प जाल्या.
वाळपयची कचेरी कंपनीन बंद केल्या. सत्तरी म्हालांतले सेवेचें नियंत्रण दिवचल म्हालांतल्यान जयत आसा. हाका लागून गांवगिऱ्या वाठारांनी बीएसएनएलची सेवा मनस्ताप दिवपी आसून सद्या तरी गिरायकांनी हे सेवे कडेन फाट केल्या.
फाटल्या तीन म्हयन्या सावन गुळेली वाठारांत ह्या कंपनीची सेवा ठप्प जाल्या. हे सेवे कडेन गंभीरतायेन लक्ष दिवचें अशी मागणी वाठारांतल्या गिरायकांनी केल्ली. पूण ताचे कडेन अजून मेरेन लक्ष दिल्लें ना. हाका लागून गिरायकांनी बेजारून हे सेवे कडेन पुरायपणान आडनदर केल्या आनी तांणी आतां खाजगी कंपनीची सेवा सुरू केल्या. गुळेली वाठारांत बीएसएनएल कंपनीची सेवा बरे तरेन मेळटाली. पूण फाटल्या तीन म्हयन्या सावन ही सेवा पुरायपणान कंटाळवाणी थारल्या.
मजगतीं, गुळेली पंचायतीन खूबशे फावटी ग्रामसभांनी थाराव मंजूर करून ताची अंमलबजावणी करपाचे नदरेन बीएसएनएल कंपनीक कळयिल्लें. पूण थारावाची दखल लेगीत अजून मेरेन कंपनीन घेतिल्ली ना. हाका लागून पंचायतीन लेगीत हे विशीं निरशेणी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
