भांगरभूंय | प्रतिनिधी
पेडण्यां घडली घडणूक; चोरांक अटक करपाची मागणी
पेडणें: मदलोवाडो, विर्नोड्यां सुचिता सीताराम नायक हे बायलेचें अनवळखी दोन मोटारसायकल चालकांनी दुकानांत सामान घेवपाचे निमित्त करून गळ्यांतलें मंगळसुत्र झोमून व्हरपाचो प्रकार 16 वेर दनपाराे एक वरांचेर घडलो. हे विशींची कागाळ सुचिता नायक हांणी पेडणें पुलिशेंत दाखल केल्या. विशेश म्हणल्यार हे घडणुकेक दोन दीस जाले. पुलिशेंत कागाळ दिवन लेगीत पुलीस अजून घडणूक थळार पाविल्ले नात. ताका लागून हे चोरयेचो तपास लायलो ना जाल्यार रस्त्यार देंवतले अशी शिटकावणी अॅड. सीताराम परब, भोवजन समाजाचे फुडारी उमेश तळवणेंकार आनी विजय विर्नोडकार बी हांणी दिली.
मेळिल्ले खबरे प्रमाण मदलोवाडो, विर्नोड्यां सुचिता सीताराम नायक (42) ह्याे दुकानांत बशिल्ल्यो. दनपारच्या वेळार दुकानांत सामान व्हरपाचे निमित्त करून दोन दुचाकी वयले चोर आयले. हातूंतले कांय जाण दुकानांत आयलें. सामान घेतलें आनी पयशे दिवन परतून गेले. उपरांत परतून एक दुचाकी चालक कांय अंतराचेर दुचाकी चालू स्थितींत दवरून उबो रावलो. ताणें काळें हॅल्मेट घाल्लें. चेरो धांपिल्लो आशिल्लो. ताचो वांगडी दुकानांत आयलो ताणें सामान मागलें. सामान दिता आसतनाच सुचिता हांचे मंगळसुत्र झोमून चोरान धांव मारली.
हे विशीं पेडणें पुलीस स्टेशनार कागाळ दाखल केल्या. विशेश म्हणल्यार दोन दीस जाले तरी चोरांक सोदपाक पेडणें पुलिसांक येस आयलें ना. पुलीस घडणूक थळार लेगीत आयले नात. ह्या प्रकरणाचो तपास ताकतिकेन लायलो ना जाल्यार रस्त्यार देंवतले अशी शिटकावणी अॅड. सीताराम परब हांणी मंगळारा दिली. ह्या वेळार उमेश तळवणेंकार आनी विजय विर्नोडकार हांणीय पुलिसांचेर टिका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
