भांगरभूंय | प्रतिनिधी
पणजी, खबरां मेज : मनरेगा खाला एससी, एसटी आनी ओबीसी कामगारां वांगडा सदांच ३२२ रुपया जोडपी सुमार ८००० कामगार फाटल्या कितल्याशाच म्हयन्यां सावन तांच्या हक्काचे मजुरीची वाट पळयत आसात. हांवें ऑक्टोबरांत हो मुद्दो काडून मुख्यमंत्री डॉ. प्रमोद सावंत हांणी हस्तक्षेप करचो, अशी मागणी केल्ली. मात आयज मेरेन हे विशीं सरकारान कांयच करूंक ना. इव्हेंटांचेर पयशे घालपाचें सोडात आनी गरीब, कश्टी कामगारांक वेळार मजुरी दियात, अशें विरोध पक्ष फुडारी युरी आलेमाव हांणी म्हणलें.
कामगारांची आडकून उरिल्लो दिसवडो दिवचो अशे आदेश डॉ. सावंत हांणी संबंदीतांक दिवप गरजेचें. दिसवड्याचे जोडीन आपल्यो गरजो पुराय करपी कश्टी कामगारांची मजुरी दवरपाचो कोणाकूच कसलोच हक्क ना, अशें तांणी म्हणलें.
भाजप सरकार अर्थ खात्याची मान्यताय घेनासतना इव्हेंट आनी कार्यावळींचेर करोडांनी रुपया खर्च करता. पूण गरीब कामगारांक मजुरी दिवपाक आडखळ हाडटा. एका दिसाच्या जेवणाक घाम गळोवपी कश्टी कामगारांची मजुरी वेळार दिवंक नाशिल्ले खातीर हांव सरकारचो निशेध करतां अशें आलेमांव हांणी म्हणलें.
कामगारांक वेळार मजुरी दिवप ना हो अनुसुचीत जमाती, अनुसुचीत जाती आनी ओबीसीचो छळ करपाच्या सरकारच्या धोरणाचोच एक भाग. गोंयांत ५१००० नोंदणीकृत मनरेगा कामगार आशिल्ल्यान तांतले ३९००० कार्डधारक जावन आसात. राज्यांत सुमार ८००० सक्रीय कार्डधारक कामगार आसा. सुमार ४२.४५ टक्के कामगार हे अनुसुचीत जमातीचे, जाल्यार २.४८ टक्के अनुसुचीत जातीचे आसात, असो दावोय युरी हांणी केला.
भाजप सरकार विवीध प्रकल्प आनी कामांक वेळार मंजुरी मेळूंक नाशिल्ल्यान खुबश्या कामगारांक १०० दीस कामां मेळना. नोंदणीकृत मनरेगा कामगारांक १०० दीस काम दिवप सरकाराचेर बंधनकारक आसा, अशें आलेमांव हांणी नमूद केलें.
भाजप सरकाराकडेन इव्हेंट कार्यावळींचेर खर्च करपा खातीर भरपूर पयसो आसा पूण गरजेवंत आनी गरिबांक मजत करपाक तांची तिजोरी रिकामी जाता अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
