भांगरभूंय | प्रतिनिधी
कळंगूट लुबाडणूक प्रकरण
म्हापशें: कळंगूटे घरा पावयता अशें सांगून मोटारींत बसोवन अर्जुन डेदादोलकर (कळंगूट) हाका वाटेर मारपेट करून आनी भांगराची सरपळी आनी रोख रक्कम काडून लुबाडणुकीचो प्रकार घडिल्लो. ह्या प्रकरणांत कळंगूट पुलिसांनी आगुस्तिन्हो कार्व्हालो (रा. माजोड्डें-साश्टी) ह्या खाप्या गुन्यांवकाराक अटक केल्या.
हो प्रकार बुधवारा 30 नोव्हेंबराक घडिल्लो. कागाळदार अर्जुन डेदादोलकर हो कळंगूटे टिटो जंक्शनाचेर राविल्लो. ताचे कडेन दुबावितान वळख केली आनी मोटारींतल्यान कागाळदाराक घरा सोडटा अशें सांगून आपले मोटारींत बसयलो. वाटेर दुबावितान मोटार थांबोवन अर्जुन हाका मारपेट केली आनी धमकी दिली.
तशेंच ताच्या गळ्यांतली 50 हजारांची भांगराची सरपळी आनी बोल्सांत आशिल्ले 9500 रुपया मेळून साडे एकोणपन्नास हजारांचो म्हालवज लुबाडलो आनी उपरांत ताका थंयच उडोवन दुबावितान मोटारी सयत धांव मारली.
ह्या प्रकरणांत कागाळदारान पुलिशेंत कागाळ दाखल केली ते प्रमाण पुलिसांनी चवकशी करीत दोन दिसां भितर दुबाविताक सांतींगणवाट, हरमला धरलो.
पुलिसांनी ह्या प्रकरणाची सिसीटीव्ही तशेंच आपल्या विस्वासू गोपाच्या माध्यमांतल्यान पुलिसांक म्हायती मेळिल्ली. ते प्रमाण दोन रातीं कळंगूट पुलिसांनी वाठारांत सांपळो लायिल्लो. दुबावीत शुक्रारा सकाळीं हरमला येतकूच ताका पुलिसांनी धरलो.
पुलिसांनी भादंसंच्या 323, 356 आनी 379 कलमा खाला दुबावीत आगुस्तिनोक अटक केली. फुडलो तपास पुलीस करतात.
पुलीस अधिक्षक निधीन वाल्सन, उपअधिक्षक विश्वेश कर्पे, निरिक्षक दत्तगुरू सावंत हांच्या मार्गदर्शना खाला हवालदार विद्यानंद आमोणकार, कॉन्सटेबल अमीर गरड, विजय नायक, गणपत तिळोजी, तशेंच उत्तर गोंय कॉल मोनीटरींग विभागाचे कॉन्सटेबल विष्णू राणे आनी सागर नायक हांचे सयत हवालदार गोविंद पटनाईक हांणी दुबाविताक सोदून काडपा खातीर व्हड कामगिरी केली.
दुबावीत आरोपी आगुस्तिन्हो कार्व्हालो हो खापो सक्रीय गुन्यांवकार आसा. ताचे आड गोंयभर विवीध पुलीस स्टेशनांनी 20 परस चड गंभीर स्वरुपाचे गुन्यांव नोंद आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.