खांडोळें महागणपती देवळांतल्या चोरी प्रकरणांतल्या दुबाविताक अटक

भांगरभूंय | प्रतिनिधी

गोंयां सयत हेर राज्यांतल्या देवळांनीय केल्यात चोरयो

फोंडें: खांडोळ्यां महागणपती देवळांत 17 ऑगस्ट दिसा जाल्ल्या चोरी प्रकरणांत संतोष परमानंद दास (42, ओरिसा) हाका फोंडें पुलिसांनी अटक केल्या. गोंया सयत भारतांतल्या विवीध देवळांनी दुबावितान ‘वन मेन शो’ प्रमाण चोरयो केल्यात. दुबाविताक न्यायालयान 4 दिसांची पुलीस कोठी दिल्या. दुबावितान पणजी, पर्वरे सयत आनीक खूबशा देवळांनी चोरयो केल्यात. फोंडें पुलीस स्टेशनाचे उपअधिक्षक सीएल पाटील हांच्या मार्गदर्शना खाला निरिक्षक विजयकुमार चोडणकार ह्या प्रकरणाचो तपास करतात.

खांडोळ्यां महागणपती देवळांत 17 ऑगस्ट दिसा रातीं उसरां चोरी करून दुबावितान अदमाशेक चार लाख रुपया परस चड म्हालवज फारायिल्ल्याचें उक्ताडार आयिल्लें. तेच रातीं हेर दुबावितांनी तिस्क उसगांवां एटीएम चोरी करून अदमाशेक 13 लाख रुपया फारायिल्ले. उसगांव चोरी प्रकरणांतल्या दुबावितांक अटक करपाक फोंडें पुलिसांक हाचे पयलींच येस मेळिल्लें.

2010 वर्सा म्हापशेंच्या एका देवळांत चोरी करून फरार जाल्लो दुबावीत कांय दिसां पयलीं पणजी पुलिसांक सांपडिल्लो. योगायोगान 2010 वर्सा फोंडें पुलीस स्टेशनार उपनिरिक्षक म्हूण कार्यरत आशिल्ले आनी सद्या पणजी पुलीस स्टेशनाचे निरिक्षक निखील पालयेंकार हांणी दुबाविताक वळखिल्ल्यान खूबशा गुन्यांवांचो तपास लागलो. अटक केल्ल्या दुबाविताक सोमारा न्यायालयांत हजर करतकूच न्यायालयान 4 दिसांची पुलीस कोठी दिल्या.

फोंडें पुलीस स्टेशनाचे उपअधिक्षक सीएल पाटील हांणी दिल्ले म्हायती प्रमाण देशांतल्या विवीध राज्यांनी वचून देवळांनी चोरी केल्ल्या दुबावीत संतोष कुमारान 17 ऑगस्टाक रातच्या वेळार खांडाळ्यां वचपा खातीर खाशेली भाड्याची मोटार पणजे सावन घेतिल्ली. रातच्या 11.30 वरांचेर खांडोळ्या महागणपती देवळा कुशीक एका अधिकाऱ्या भशेन भेस करून देवळांत वचून चोरी केल्ल्याचें उक्तें जाल्लें.

देवळांत चोरी केले उपरांत फांतोडेर 4.30 वरांचेर दुबावितान त्याच वाहन चालकाक फोन करून आपयलो आनी पणजे गेलो. कांय दिसां पयलींच पणजी पुलिसांक एका चोरी प्रकरणांत दुबावीत सांपडलो. ताका लागून खूबशा गुन्यांवांचो तपास लागलो.

म्हापश्यां 2010 वर्सा दुबावितान एका देवळांत चोरी केल्ली. हे चोरयेचो तपास फोंडें पुलीस स्टेशनाचे तेन्नाचे निरिक्षक सीएल पाटील हांचे कडेन सोंपयिल्लो. त्या वेळार तेन्नाचे निरिक्षक आनी उपनिरिक्षक आशिल्ले निखील पालयेंकार हांणी दुबाविताक ताब्यांत घेवपा खातीर कारवार गेल्ले. कारवार पुलिसांनी अटक केले उपरांत दुबाविताचेर हॉस्पिटलांत उपचार सुरू केल्ले. गोंय पुलिसांच्या हाताक लागचे पलयींच दुबावितान हॉस्पिटलांतल्यान धांव मारिल्ली. पूण कांय दिसां पयलीं पणजे एका चोरी प्रकरणांत ताब्यांत घेतिल्ल्या दुबाविताक निरिक्षक निखील पालयेंकार हांणी वळखलो. गोंय, महाराष्ट्र, कर्नाटक सयत हेर राज्यांतल्या खूबशा देवळांनी दुबावितान चोरी केल्ल्याचें उक्तें जालां.