भांगरभूंय | प्रतिनिधी
तिडकल्ल्या ग्रामस्थांनी पंचायत मंडळाची घेतली भेट
फोंडें: खांडेपार आनी उसगांव पंचायत वाठारांतल्या दोन गांवांतल्यान वचपी म्हादय न्हंयचेर बंदारो बांदपा वयल्यान तो वादाच्या चपक्यांत सांपडला. सोनारबाग-उसगांव वाठारांतल्या ग्रामस्थांनी बंदाऱ्याक विरोध करपाक सुरवात केल्या आनी तिडकल्ल्या ग्रामस्थांनी काल (मंगळारा) सकाळीं पंचायत मंडळाची भेट घेवन चर्चा केली. उदका स्रोत खात्या कडल्यान जो मेरेन थळाव्यांक बंदाऱ्या संबंदी म्हायती दिनात तो मेरेन बंदाऱ्याचो बुन्यादी फातर घालूंक दिवचे नात अशी शिटकावणी उसगांव पंचायतीचे सरपंच नरेंद्र गांवकार हांणी दिली.
उसगांव पंचायत वाठारांत येवपी सोनारबाग वाठारांत वर्सावळी प्रमाण पावसाच्या दिसांनी न्हंयेच्या उदकाचो पांवडो वाडत आशिल्ल्यान खूबशीं घरां उदका खाला वतात. तशेंच पावसाच्या दिसांनी मुर्डी-खांडेपार वाठारांत लेगीत खूबशीं घरां उदका खाला वतात.
खांडेपार वाठारांत हाचे पयलींच लोकांनी बंदाऱ्याक विरोध केला. सद्या उसगाव पंचायत वाठारांत लेगीत बंदाऱ्याक विरोध जावंक लागिल्ल्यान सरकारान जबरदस्तीन बंदाऱ्याचो बुन्यादी फातर घाल्यार वाठारांत तणावाची स्थिती निर्माण जावंक शकता.
गोपां कडल्यान मेळिल्ले म्हायती प्रमाण 3 नोव्हेंबर दिसा बंदाऱ्याचो बुन्यादी फातर सोनारबाग वाठारांत घालपाचे आसात. दोनूय पंचायत वाठारांतले लोक बंदाऱ्याक विरोध करीत आशिल्ल्यान वाठारांत तणावाची स्थिती निर्माण जावंक शकता.
बसके उपरांत म्हायती दितना सरपंच नरेंद्र गांवकार हांणी सोनारबाग वाठारांत बंदारो उबारपा खातीर उसगांव पंचायतीन कसलेच दाखले दिल्ले नात. उदका स्रोत खात्याचे मुखेल अभियंते प्रमोद बदामी आनी उदका स्रोत खात्याचे मंत्री सुभाष शिरोडकार हांचे कडेन लेगीत बंदाऱ्या संबंदी चर्चा केल्या. उदका स्रोत खात्याच्या अभियंत्यांक बंदऱ्या संबंदीची म्हायती थळाव्यांक दिवपा खातीर खासा बसकेचें आयोजन करचें अशी विनंती केल्या. जो मेरेन अभियंते थळाव्यांक बंदाऱ्या संबंदी म्हायती दिवचे नात तो मेरेन बुन्यादी फातर बसोवंक दिवचे नात अशें गांवकार हांणी सांगलें.
मजगतीं, खांडेपार पंचायत वाठारांतल्या मुर्डी गांवांतले लोक फाटल्या कांय म्हयन्या सावन बंदारो उबारपा खातीर खर विरोध करीत आसात. खांडेपार पंचायतीचे ग्रामसभेंत लेगीत बंदाऱ्याच्या विशयाचेर चर्चा केल्या. हालींच जाल्ले ग्रामसभेंत सरपंच नावेद तहसीलदार हांणी लेगीत लोकां बरोबर रावपाचें आस्वासन दिलां. लोकांचे मागणे प्रमाण उसगांव आनी खांडेपार पंचायत मंडळ लेगीत बंदाऱ्या संबंदी पुराय म्हायती समजून घेवपाचें प्रतिक्षेंत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
