खलनायकांक नायकत्व दिवपाचें राजकारण

भांगरभूंय | प्रतिनिधी

दिल्ली, यूपी आनी हरयानांतले त्यागी समाजातले हजारांनी लोक गुन्यांवकार त्यागीच्या बाजून रस्त्यार देंवले उपरांत चित्र बदल्लें. दोन दीस फाटीं बढायो मारपी सांसद…..

समाजातले बहुसंख्यधर्मीय नायक मानतात, त्या गुन्यांवकारां मुखार राजकी फायद्या खातीर सरकारां लोटांगण घालतात,
अशें चित्र दिसपाक लागलां.
सादेशे उदाहरण दिवपाचे जाल्यार, काय म्हयन्यां फाटी दिल्ली लागसार गाझियाबादेंतल्या हावजिंग सोसायटींत भाजप कार्यकर्तो श्रीकांत त्यागी हाणें एके बायल सभासदा वांगडा वाद जाल्ले वेळार तिका बुरश्यो गाळी संवत धुकलिल्ली तो व्हायरल जाल्लो विडियो जगान पळयलो. सगळ्या थरांतल्या लोकांनी ताचो निशेध केलो. त्यागीक अटक जाली. ताची सोसायटातली अवैध निर्माणां प्रशासनान बुलडोझर चलोवन मोडून उडयलीं. त्यागीचेर खर कारवाय जावचे खातीर थयथयाट घालपी एका भाजप सांसदान राष्ट्रीय वाहिन्यांक मुलाखती दिवन मेळयिल्ली प्रसिद्धी, वाहवायी अल्पजीवी थारली. दिल्ली, यूपी आनी हरयानांतले त्यागी समाजातले हजारांनी लोक गुन्यांवकार त्यागीच्या बाजून रस्त्यार देंवले उपरांत चित्र बदल्लें. दोन दीस फाटीं बढायो मारपी सांसद तत- पप करीत आपल्याक चुकीची म्हायती दिल्ल्यान गैरसमज जालो, अशें सारोवन व्हरपाक लागलो. श्रीकांत त्यागी बंदखणीतल्यान सुटलो तेन्ना त्यागी समाजान ताका व्हडा दबाज्यान येवकार दिलो. खलनायक पक्ष कार्यकर्तो श्रीकांत त्यागी आतां फुडाऱ्याचे भुमिकेंत 2024 वर्सा सत्ता पक्षा वतीन सांसद म्हूण वेंचणूक लढोवपाची तयारी करपाक लागला.
त्यागीचे तुळेन चड गंभीर पूण ‘लोकप्रिय’ गुन्यांवकारां मुखार राज्य सरकारांनी सत्ते खातीर लोटांगण घाल्लां. दोन साध्वींचेर बलात्कार केल्ले आरोप तशेच ताचे काळ्या कृत्यांची बातमी दिसाळ्यांत छापपी संपादकाच्या हत्येक कारणीभूत आशिल्याचें न्यायालयांत सिद्ध जाल्ल्या कारणान राम रहिम इन्सान बंदखणीत खास्त भोगता खरो, पूण हरयाणा, हिमाचल, दिल्लींत आजूय ताका मानपी अनुयायी भरपूर आशिल्ल्यान वेंचणुके वेळार सत्तापक्षाचे सरकार ताका बंदखणी भायर काडून त्या समाजाची सहानुभूती मेळवपाचो यत्न करता. सद्या हिमाचलांतले वेंचणुकेक लागून पॅरोलाचेर सोडिल्ले कडेन तो सत्संगाच्यो सभा लावपाक लागला. सत्संगांत भाजपाचे नेते ताका ‘पिताजी’ संबोधत आपापल्या मतदार संघात येवन ‘आशिर्वाद’ दिवपाचीं आमंत्रणां भर सभेंत दितात. हो सगळो प्रकार पळोवन ताका खास्त दिवपी न्यायाधीश, ‘त्यो’ दुर्दैवी साध्वी आनी खून जाल्ल्या संपादकाचे कुटुंबियांचे मनस्थितीची आमी कल्पना करूंक शकतात.
2002 गुजरात दंग्यांच्या प्रकरणांत बिल्किस बानो हिच्या 7 कुटूंबियांची हत्या आनी तिचेर लिंगीक आगळीक केल्ले खातीर जल्मठेपेची खास्त भोगतल्या 11 गुन्यावकारांक कायद्यांतली पळवाट वापरून सोडोवपाच्या कामांत गुजरात सरकारान विशेश आस्था दाखयली. ह्या भयानक प्रकरणांत सीबीआयन त्या गुन्यांवकारांचेर लागिल्ले आरोप सिद्ध करपाक भोव त्रास काडून कोर्टा मुखार सबळ पुरावे सादर केल्ले. तांच्या सुटके उपरांत बहुसंख्यंक धर्मीय संस्थांच्या वांगड्यांनी तांकां माळो घालप, तांचीं तोंडां गोड करप आनी बायलांनी तांच्यो आरती ओवाळप सारकिल्ले मनीसपणाक लजेक घालपी संवेदनाहीन प्रकार जगान पळयले.
विशिश्ट धर्म, पंथ, जातींतल्या खास्त भोगतल्या गुन्यावकारांचेर मेहरबानी दाखोवप हें समाजात ध्रुवीकरण साधून वेचणुकांत ‘त्या’ समाजांतल्यांची मतां मेळोवपा खातीर राजकी पक्षान केल्ली खेळी आसता. आपलो धर्म, जात- पात, पंथ, वंशातल्या फटींग, गुंड, बलात्कारी, गुन्यांवकार खलनायकांच्या वायट कर्तुबांचे पुरावे आसतना तांची नायक, संत म्हूण तोखणाय करपाची निर्लज्यता आयज देशांत वाडीक लागल्या.
हेच इतिहासांतल्या वादग्रस्त व्यक्ती विशेशांचे बाबतीतूय घडपाक लागलां. खलनायकी कर्मदळिद्रीपणा इतिहासिक दास्तावेजांत नमूद केल्लो आसतनाय राजकी सुवार्थ सादपाक इतिहासिक वादग्रस्त व्यक्तिमत्वांक वैधताय दिवपाचो यत्न चल्ला. सावरकर हांकां वीर मानपी आनी विरोध करतल्यांची जुगलबंदी लेख, अग्रलेख, चर्चासत्रां आनी वादविवादांच्या रूपान दीस- रात व्हांवत आसता. 1911 वर्सा बंदखणींत पांय दवरले उपरांत 1924 वर्सा सुटके मेरेन सावरकर हांणी पांच माफीनामे ब्रिटीश सरकाराक बरयिल्ले, तांचो मजकूर जगजाहीर आसा…. आनी ते माफीनामे खुद्द सावरकर हांणी न्हयकारिल्ले नात. 1911 वर्सा बंदखणींत गेले उपरांत बरयिल्ल्या पयल्याच माफीनाम्यांत ‘आपली सुटका केल्यार सरकारचे प्रति प्रगाढ निष्ठा दाखयतलों आनी ब्रिटीश साम्राज्याचो विस्तार करपाक खांद्याक खांदो लावन आपूण झट्टलो,’ अशे आस्वासन दिल्लें आसा.
हातच्या कांकणाक हारश्याची गरज नासता, हें सगळे सावरकरमोगी जाणात. तरीय पूण तांणी मागिल्ली माफी हो एके रणनितीखाला आशिल्लो, अशी सारवासारव करतना ते दिसतात. पूण 1920 वर्सा सुटके पयलीं बरयिल्ल्या पत्रांत आपूण आणि आपलो भाव बरें आचरण दवरतले आनी आपल्या राबित्याचो जिल्हो सोडून इतर भागांनी पाय दवरचे नात, म्हळां तशेंच सरकारची तशी इत्सा आसत जाल्यार पुलीस स्टेशनांत हाजेरी दिवपाची तयारीय दर्शयल्या. प्रत्यक्षांत सुटके उपरांतूय 1924 ते 1937 मेरेन सावरकर हांणी रत्नागिरी सोडली ना. ब्रिटीशां कडल्यान म्हयन्याक 60 रुपया पेन्शनूय स्विकारलें.
1941 वर्सा बिहारच्या भागलपूरांत विश्व हिंदू परिषदेच्या माचये वयल्यान सावरकर हांणी भारतीय तरणाट्यांक जपान विरोधांत ब्रिटीश सेनेत आसाम, बंगालांत भर्ती जावचे म्हूण आनी नेताजी सुभाष चंद्र बोसाच्या आझाद हिंद फौजेत भर्ती जावचे न्हय म्हूण आवाहन केल्लें.
आयज हिंदुत्ववादी सावरकरांची प्रतिमा हिंदुत्व संकल्पने वांगडा जोडपाचो यत्न करता आसले तरी आपूण नास्तिक, बुद्धीवादी हे सावरकर हांणी आपल्या वक्तव्यांतल्यान आनी लिखाणांतल्यान दाखोवन दिलां. तांणी गायेक गोमाता मानली ना, फकत जनावर मानली आनी देशाक मातृभूमी मानली ना तर पितृभूमी मानली. ‘पितृभूमी’ ही जर्मनीच्या बाबतीत हिटलराचीय संकल्पना आशिल्ली.
सावरकरांनी सुटका जावची म्हूण माफी मागली तेन्ना 173 सुटके झुजारी छळ, यातना, उपासमारी सोसून थंय फासार चडल्यात, हें आमी विसरपाक जायना. शारिरीक यातना, मरणांक भिवपी कोणीय मनीस वीर आसूंकच शकना आनी असल्यांनी खरें तर स्वातंत्र्य झुजाचे भानगडींत पडचेंय न्हय. आपले जिणेची भीक ब्रिटिशां लागी मागची न्हय, अशें नेहरूक सांगपी आनी माफीनामो दिवन आपलो जीव वाटावपाचो यत्न केलो जाल्यार आपूण तुमचें तोंड पळोवपाक ना, अशें आपल्या आवय- बापायक शिटकावपी भगतसिंग हांचे सारकिल्ल्या कर्मठ झुजारूंची ही
कर्मभूंय.
इतिहासांत जांव वर्तमानांत, दस्तावेज, पुराव्यांत आशिल्ल्या बऱ्या- वायट म्हायतीच्या आधाराचेर मनशाची महानता थारावपाक जाय. नेताजी सुभाषचंद्र बोस हांचें सुटके झुजांतलें योगदान आनी हौतात्म्य हें वंदनीय आसलें तरीय लाखांनी ज्यूंची क्रूरपणान संहार करपी हिटलरा वांगडा तांचे इश्टागतीचो कलंकूय आमी विसरपाक जायना.

दीपक लाड
पर्वरी