लुथरा भावां सयत पांच जाणां आड आरोपपत्र सादर

भांगरभूंय | प्रतिनिधी

2306 पानां सयत 50 साक्षिदारांचो आस्पाव

म्हापशें: हडफड्यां दुर्घटणा जाल्ल्या बर्च बाय रोमियो लेन ह्या नायट क्लबाक उत्पादन शुल्क परवानो मेळोवपा खातीर कांदोळेच्या भलायकी केंद्राचो बनावट हरकत ना दाखलो तयार केल्लो. ह्या बनावटीच्या प्रकरणांत म्हापशें पुलिसांनी क्लबाचे धनी लुथरा भाव आनी अजय गुप्ता सयत वट्ट पांच जाणां आड म्हापशें न्यायालयांत आरोपपत्र दाखल केलां. 50 साक्षिदारांचे साक्षी सयत 2,306 पानांचें हें आरोपपत्र आसा.

पुलिसांनी जीएस हॉस्पिलिटी एलएलपी ह्या कंपनीचे अधिकृत धनी सौरव लुथरा, गौरव लुथरा आनी अजय गुप्ता हांचे सयत क्लबाचे अधिकारी दिनेश खेरा आनी गोंय अबकारी खात्याचे वरिश्ठ कारकून गौरेश गांवस हांचे आड खोलायेन चवकशी केले उपरांत आराेपपत्र सादर केलां. ह्या प्रकरणांत पुलिसांनी गुप्ता आनी लुथरा भावांक अटक केल्ली. जाल्यार दुबावीत खेरा आनी गांवस हांकां अटकपूर्व जामीन अर्ज मंजूर केल्लो.

मजगतीं, बर्च क्लब उजो दुर्घटणेच्या चवकशी वेळार हणजूण पुलिसांचे नदरेक हो बनावटगिरीचो प्रकार उक्तडार आयिल्लो. उपरांत कांदोळी मुळाव्या भलायकी केंद्राचे अधिकारी डॉ. रोशन नाझारेथ हांणी म्हापशें पुलिशेंत फाटल्या 17 डिसेंबर 2025 दिसा हे विशींची कागाळ दाखल केल्ली. हो प्रकार 13 डिसेंबर पयलीं अबकारी खात्याच्या म्हापशें निरिक्षक कचेरेंत घडिल्लो. पुलिसांनी भारतीय न्याय संहितेच्या 332(2), 336(3), 338, 340(2), 318(4) आनी 3(5) कलमा खाला दुबावितां आड गुन्यांव नोंद केल्लो.

मजगतीं, सांकवाडी हडफड्यां सर्वे क्रमांक 159/0 तलें घर क्रमांक 502/1त चलपी जीएस हॉस्पिलिटी एलएलपी कंपनीच्या बर्च क्लबा खातीर उत्पादन शुल्क परवानो मेळोवपाच्या उद्देशान दुबावीत आरोपींनी समान हेतान हेतुपुरस्सर आनी अप्रमाणीकपणान कांदोळी मुळाव्या भलायकी केंद्राचें हरकत ना प्रमाणपत्र (एनओसी) तयार केलें. जातूंत दुबावितांनी फिर्यादींची नक्कल करून सय बनावट केली आनी रजिस्टरांतल्या बनावट नोंदीचो वापर केल्लो.

हो बनावट दाखलो खरो आशिल्ल्याचें भासोवन तो उत्पादन शुल्क खात्या कडेन सादर केलो. जेणेकरून उत्पादन शुल्क परवान्या खातीर कागदोपत्री वेव्हार पुराय करूंक मेळटले आनी दुबावीत आरोपी हे हो उत्पादन शुल्क परवानो मेळोवपाक येसस्वी जाले. जाका लागून फिर्यादी तशेंच अबकारी अधिकाऱ्यांची फटवणूक जाल्ली.