भांगरभूंय | प्रतिनिधी
पुती गांवकार हांचें आवाहन
फोंडें: गोंयांतल्यो खणी बंद जाले उपरांत कामगारांचेर व्हड अर्थीक संकश्ट कोसळ्ळां. सरकारान सद्या खणीची पावणी करपाची प्रक्रिया सुरू केल्या. खणी सुरू जाले उपरांत सरकारान पयलींच्या कामगारांक परतून कामार घेवन दिल्लें आस्वासन पूर्ण करपाचें आवाहन गोवा मायनींग पिपल्स फ्रंटाचे अध्यक्ष पुती गांवकार हांणी केलां.
आदले मुख्यमंत्री मनोहर पर्रीकार आनी सद्याचे मुख्यमंत्री डॉ. प्रमोद सावंत हांणी हाचे पयलीं खणी परतून सुरू जाले उपरांत पयलींच्याच कामगारांक आस्पावन घेवपाचें आस्वासन विधानसभेंत दिल्लें. त्या आस्वासना प्रमाण सरकारान प्रक्रिया सुरू केल्ले खणीचेर पयलींच्याच कामगारांक नोकरेंत आस्पावन घेवपाची अट घालपाची गरज आशिल्ल्याचें पुती गांवकार हांणी म्हणलें.
केंद्र सरकारान हाचे पयलींच उण्यांत उणो पगार 553 दिवपाचें जाहीर केलां. पूण गोंय सरकार कामगारांक अजून लेगीत 307 रुपया उण्यांत उणो पगार दिता. कामगार मंत्र्यांनी गंभीरतायेन लक्ष दिवपाची गरज आशिल्ल्याचें पुती गांवकार हांणी म्हणलें.
गोवा डेरींत फाटलीं स ते सात वर्सां सावन काम करपी सुमार 10 कामगारांक काडून उडोवपाचो निर्णय कांय दिसां पयलीं संचालक मंडळाचे बसकेंत घेतला. गोवा डेरींत कितलेशेच कामगार सद्या निवृत्तीचे वाटेर आसात. ताका लागून कामगारांक घरा धाडचे परस तांकां थंय आस्पावन घेवपाची गरज आशिल्ल्याचें पुती गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
