भांगरभूंय | प्रतिनिधी
30 लाखांचें भांगर आनी 4 लाख रोख जप्त
मडगांव: कोंकण रेल्वे पुलिसांनी धांवते रेल्वेंत चोरी करपी आंतरराज्य टोळयेंतल्या चार जाणांक अटक केल्ली. आतां बेळगांवांतल्यान आनीक एकलो दुबावीत संतोष शिरतोडे हाका अटक केल्या. ताचे कडल्यान 30 लाखांचें भांगर आनी 4 लाख 5 हजारांची रोख रक्कम जप्त केल्या.
फाटल्या सप्तकांत महाराष्ट्र आनी कर्नाटक पुलिसांच्या सहकार्यांतल्यान कोंकण रेल्वे पुलिसांनी रेल्वेंत चोरी करपी टोळी उजवाडा हाडून चार दुबावितांक अटक केल्ली. दुबावितां कडल्यान चारयेचें 1 कोटीचें भांगर आनी 50 हजार रोख रक्कम जप्त केल्ली.
काणकोण रेल्वे स्टेशनार गाडी क्रॉसिंगे खातीर राविल्ली तेन्ना 2 मे 2023 दिसा 4 कोटी रुपया मोलाचें 7 किलाच्यो भांगराच्यो वस्ती आशिल्लें बॅग अनवळख्यांनी फारायिल्लें. संपत जैन हांचे कडेन काम करपी अशोक आर. हाणें ह्या प्रकरणांत कोंकण रेल्वे पुलीस स्टेशनार कागाळ नोंद केल्ली. कोंकण रेल्वे पुलीस उपअधिक्षक गुरूदास कदम हांणी पुलीस निरिक्षक सुनील गुडलर आनी वांगड्यां कडल्यान कर्नाटक आनी महाराष्ट्रांत ह्या प्रकरणाचो तपास केल्लो.
महाराष्ट्रांतल्या कवठे महांकाळ सांगली सावन संदीप वसंत भोसले (40, रा. कवठे महांकाळ) आनी अक्षय राम चिनवल (28, मूळ रा. खानापूर, बेळगांव) ह्या दोगांक 28 जून दिसा ताब्यांत घेतिल्लो. तांचे कडली शेवोर्लेट क्रुझ आनी मारुती रिट्झ ह्या दोन गाडयां सयत दोन म्हारगेले मोबायल जप्त केल्ले.
चवकशे वेळार अर्चना मोरे (42, रा. तलोजा, नवी मुंबय) हिचें नांव मुखार आयलें. चवकशी वेळार भांगराच्यो वस्ती नेमक्यो केन्ना येतल्यो हाची म्हायती अर्चना मोरेन दुबावीत संदीप भोसले आनी अक्षय चिनवल हांकां दिल्ल्याचें मुखार आयलें. ते प्रमाण चारूय जाणांक अटक करून तपास सुरू आसा.
मजगतीं, कोंकण रेल्वेचे पुलीस निरिक्षक सुनील गुडलर, कॉन्स्टेबल अमरदीप चौधरी आनी समीर शेख हांणी बिरेस्तारा मुंबय वचून आनीक 12 लाखांचें चोरयेचें भांगर जप्त केल्लें आनी ताचे आदीं 1 कोटीचें भांगर आनी 50 हजारांची रक्कम जप्त केल्ली. कोंकण रेल्वे पुलीस उपअधिक्षक गुरुदास कदम हांच्या मार्गदर्शना खाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
