कोंकणी भाग गोंयांक मेळचे

भांगरभूंय | प्रतिनिधी

ज्या वाठारांतल्यान म्हादय व्हांवता ते कणकुंबी, जांबोटी सारके वाठार कोंकणी भाशीक. हे वाठार गोंयांत आयल्यार म्हादयचो पुराय वाठार गोंयांत येवपाचो. सरकार हाचेर विचार करीत व्हय?

वेंचणुको लागीं पावतात, तेन्नाच आमच्या राजकीय फुडार्‍यांक कंठ फुट्टा आनी ते खुदूंक लागतात. तांच्या उलोवपांतल्यान नवे वाद
निर्माण जावचे, होच तांचो हेतू आसता. वाद निर्माण जालो तरूच तांकां प्रसिद्धी मेळपाची. नासल्यार अमको फुडारी आसा हाची जनतेक याद कशी उरतली? तर सद्याक अश्याच एका वादाक सुरवात जाल्या. तसो हो वाद नवो न्ही. भाशावार प्रांत रचना निर्माण जायत सावन हो वाद चालूच आसा. हय, कर्नाटक आनी महाराष्ट्र हांचे मदलो सिमावाद. तशें महाराष्ट्राक सगळे वाठार तांचेच दिसतात. आतां गोंय वेगळें राज्य जालें म्हणून सुटलां, नासल्यार गोंयचेरूय तांची नदर आसली. ‘बेळगांव, कारवार, निपाणी, गोव्यासह संयुक्त महाराष्ट्र झालाच पाहिजे’ ही तांची घोशणा चालूच आसता. आतां तांतल्यान गोंय तितलें कुशीक सरलां. म्हणल्यार तांकां कुशीक दवरचें पडलां. नासल्यार ओपिनियन पोल गोंयकारांनी जिखून लेगीत युद्ध हरले, पूण लढाय चालूच आसा म्हणपी हे लोक.
ह्या प्रश्नाचेर कितले तरी आयोग बसयले. पूण, ताणीं दिल्लो निकाल दोनूय राज्यांक मान्य जालो ना. दोनूय हटवादी राज्यां. आपलेंच खरें म्हणपी. मागीर ह्या प्रश्नाचेर तोड कशी मेळत? निमाणच्या आयोगान दिल्लो अहवाल कर्नाटकान मानून घेतिल्लो, पूण तो महाराष्ट्राक मान्य जालोना. आतां अहवालांत कितें आसलें तर महाराष्ट्रान दावो केल्यात तांतले बेळगांव, निपाणी हे वाठार कानडी भाशीक जाल्यार कारवार सारके वाठार कोंकणी भाशीक. हे मराठी भाशीक नाशिल्ल्यान महाराष्ट्राक मेळप शक्य ना. कर्नाटकान रोखडोच हो अहवाल मान्य केलो, पूण जे वाठार कोंकणी म्हणून सांगलें ते कोंकणी राज्याचे सुवादीन करचे अशें मात तांकां दिसलें ना आनी ते वाठार कोंकणी जाल्ल्यान आमचे देखून ते आमकां मेळूंक जाय अशी गोंयांनूय मागणी केली ना.
कशी करतले मागणी? मुळांत गोंय हें कोंकणी भाशीक राज्य हेंच आमच्या राजकर्त्यांक खबर आसा काय ना हो दुबाव. तातूंत हे वाठार मागल्यार आमचे अल्पसंख्यांक दुखावचे नात मूं हो भंय. आतां हो भंय कित्याक तेंच कळना. कर्नाटकांतल्या ह्या कोंकणी भाशीक वाठारांनी अल्पसंख्यांक ना तर? आज तर कारवारचे लोक उगतेपणान आमी कोंकणी भाशीक म्हणपाचें सांगतात आनी कांय जाण कारवार गोंयांत घालचें म्हणपाची मागणी करतात. पूण, कर्नाटक सरकार हे मागणे कडेन दुर्लक्ष करता. आपणालें सहजतायेन काडून कोण दुसर्‍याक दितलो? तुजें तें म्हजें आनी म्हजें तें बाये बाबाचें अशें हांचें वागणें. जेन्ना कर्नाटकान अहवाल मानून घेतलो तेन्नाच कोंकणी वाठार गोंयचे सुवादीन करप हें तांचें कर्तव्य आसलें. कर्नाटक कर्तव्याक चुकलें अशेंच म्हणचें पडटलें.
आतां कर्नाटकाच्या मुख्यमंत्र्यान एक वाद निर्माण केला. अक्कलकोट आनी सोलापूर जिल्ह्यांत कानडी भाशीक चड आशिल्ल्यान ते वाठार कर्नाटकाक दिवचे अशी ताणीं मागणी केल्या. आतां कर्नाटकांतल्यान अशी मागणी जाली जाल्यार महाराष्ट्र कितें वोगी बसतलो व्हय? ते तर संदेची वाटूच पळेतात. महाराष्ट्रांतले एकूण एक फुडारी एकदम तुटून पडले. अशें कितेंय घडटा तेन्ना महाराष्ट्रांतले सगळे फुडारी एक जातात. मागीर थंय कोण खंयच्या पक्षाचो हाका म्हत्व आसना. राज्य पयलें आसता आनी सगळ्यांची मतां एक आसतात. महाराष्ट्राच्या मुख्यमंत्र्यान म्हणलें ‘आपूण चाळीस दीस बंदखणींत वोगीच रावलों तर? कांयच मेळचें ना तुमकां.’ उपमुख्यमंत्र्यान म्हणलें, ‘एक इंच जागो मेळचो ना. उरफाटें तुमचे कडले कारवार, निपाणी, बेळगांव आमकां दियात.’ उद्धव ठाकरेन म्हणलें, ‘याला भुताने पछाडले ..’ कोणे कितें आनी कोणे कितें.
पूण हें सगळें चलतना तांकांय आपूण कारवार मागतात तो कोंकणी वाठार आनी ताचेर गोंयचो हक्क म्हणपाचें सुचलें ना. इतलेंच कित्याक तुमी जेन्ना भाशीक लोकां खातीर हे वाठार आपणाचे म्हणटात जाल्यार तुमचे कडेन आशिल्ले सिंधुदुर्ग जिल्ह्या सारके कोंकणी वाठार गोंयचे सुवादीन करचे अशें कित्याक दिसना तर तुमकां? जेन्ना मराठी भाशीक रावतात ते वाठार महाराष्ट्रांत आनी कानडी भाशीक रावतात ते वाठार कर्नाटकांत आसचे अशें दिसता तेन्ना कोंकणी भाशीक रावतात ते वाठार कोंकणी राज्याक मेळचे अशें दिसूंक नाका आसलें? पूण ना. आमी आमचे कडलें सोडचे नात आनी तुमचे कडलें घेतले बगर रावचे नात. अशी वृत्ती आसतकूच प्रश्न सुट्टले तरी कशे? तशें पळोवंक गेल्यार हे प्रश्न कोणाक सुटिल्लेच नाका आसता. प्रश्न सुटल्यार हांचें म्हत्व सोपतलें. हांकां कोण विचारचे नात. देखून हे प्रश्न तशेच लोंबकळत उरूंक जाय तरूच राजकारण करूंक मेळटलें न्ही.
मदींमदीं अशे वाद निर्माण करप, ल्हान सान दंगली घडोवन हाडप आनी आपणालें सादोवन घेवप. लोकूय आसात पिशे. घालतले धुमशणां. बसी आडायतले, फातोर मारतले. लुकसाण कोणाचें करतात ताचो विचारूच करचे नात. आनी हे फुडारी मेरेर बसून तांकां चिथायतले. एकदां सादलें म्हणजे फुडारी नामानिराळे आनी हे लोक कोर्टांत पासयो मारतले. नासल्यार सर्वोच्च न्यायालयांत आशिल्ल्या ह्या प्रश्नाचेर उलोवपाची कर्नाटकच्या मुख्यमंत्र्यांक गरज आसली?
सद्याक हो सिमावाद सर्वोच्च न्यायालयांत आसा. खरें तर गोंय सरकारान हातूंत वांटेकार जावपाची गरज आसली. कोंकणी वाठार आमचो तो आमकां मेळचो असो दावो करपाची गरज आसली. हांतल्यान म्हादयचो प्रश्नूय कायमचो सुटपाचो. ज्या वाठारांतल्यान म्हादय व्हांवता ते कणकुंबी, जांबोटी सारके वाठार कोंकणी भाशीक. हे वाठार गोंयांत आयल्यार म्हादयचो पुराय वाठार गोंयांत येवपाचो. सरकार हाचेर विचार करीत व्हय?

अभयकुमार वेलिंगकार
9423884687