भांगरभूंय | प्रतिनिधी
पणजी, प्रतिनिधी : कला अकादमी आयोजीत ४८ वे राज्य पांवड्या वयले कोंकणी नाट्य सर्तींत वांटो घेवपाक इत्सूक आशिल्ल्या सगळ्या नोंदणीकृत संस्थांनी आपल्यो प्रवेशिका दाखल करपाची निमाणी तारीख ५ जानेवारी आसा. हें सर्तींत नाटक सादर करपाचो क्रम त्याच दिसा सांजेवेळार ५ वरांचेर आदिलशाह पॅलेसींत कला अकादमीच्या कार्यालयांत सगळ्या संस्था प्रतिनिधींच्या मुखार चिटयो उडोवन थारायतले.
तशेंच प्रवेशिका फाटीं घेवपा खातीर ५ दिसांचीच मुजत आसतली.
इत्सूक नाट्यसंस्थांनी प्रवेशिके वांगडा प्रवेश शुल्क पांचशें रुपया आनी अनामत रक्कम म्हणून ५ हजार रुपया अकादमी कडेन भरप गरजेचें. ही रक्कम कार्यालय कामाच्या दिसा सदांच सकाळीं १० ते दनपरां १ आनी २ ते सांजेवेळार ४ वरांचेर स्विकारतले हाची सगळ्यांनी नोंद घेवची असो उलो कला अकादमीन मारला.
नोंदणी आनी नुतनीकरण जाल्ल्या संस्थांकूच हे सर्तींत वांटेकार जावपाक मेळटलें. प्रवेशिका दाखल करपाच्या वेळार ही संस्था नोंदणी वा नूतनीकरणाची प्रत वांगडा जोडप गरजेचें. सर्तीचे नेम आनी अटी तशेंच प्रवेशिका आदिलशाह पॅलेस, आदलें सचिवालय, पाटो- पणजी हांगा कला अकादमीच्या येवकार कुडींत फुकट उपलब्ध आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
