भांगरभूंय | प्रतिनिधी
भांगरभूंय । प्रतिनिधी
केरी-सत्तरीः बायलेचो घोव मरतगीर तिका विधवा करपाचें जे विधी आनी अनिश्ट प्रथा आसा ती खासा थाराव पास करून बंद करपाची मागणी केरी पंचायत वाठारांत सामाजीक मळार वावुरपी लोकांनी सरपंच दीक्षा गांवस हिका एक निवेदन भेटोवन केल्या. ताचेर सुमार 70 नागरिकांनी सयो केल्यात. ग्रामपंचायचीची खासा ग्रामसभा घेवन तातूंत विधवा विधीचेर बंदी घालपी थाराव पास करपाची सूचोवणी नागरिकांनी केल्या.
बायलेचो घोव मेल्या उपरांत तिका विधवा करपा खातीर कांकणा फोडप, मंगळसूत्र तोडप, कुकूम पुसप हे अन्यायकारक विधी भारतीय संविधानांतल्या 14व्या कलमाचें उल्लंघन करपी आसात. ते खातीर बंद करपाक जाय. विधवांक समाजांत वावुरतना जायते तरेचे भेदभाव करतात. गुन्यांवकारी आशिल्ले भशेन तिका वागणूक दितात. तांकां समानतेची वागणूक मेळपाक जाय अशें नागरिकांनी पंचायत मंडळाक सांगलां.
विधवा विधी बंद करपाची मागणी करपी निवेदन आमकां दिलां. ताचेर चर्चा करपा खातीर रोखडीच पंचायतीची खासा ग्रामसभा घेतले. हे संबंदी पंचायत वाठारांत जाग्रुती जावची आनी देवस्थान समितीची मता जाणून घेवपा खतीर आमी तांकां पत्रां धाडल्यांत अशी म्हायती सरपंच दीक्षा गांवस हिणे दिली. बायलांक अपमानाची वागणूक दिवपी कांय अनिश्ट प्रथा अजूनय सुरू आसात. काळा प्रमाण तातूंत बदल जावपाची गरज आसा. केरी पंचायत वाठारांतल्या लोकांनी आमचे मोहिमेक बरो प्रतिसाद दिला. विधवा प्रथा बंद जावपाक जाय अशें जायत्या जांणानी सांगलां अशें हे विधी बंद करपा खातीर फुडाकार घेवपी माधवी राणे हिणे सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
