भांगरभूंय | प्रतिनिधी
पणजी: पेडणें पुलिसांनी 2020 वर्सा व्हड प्रमाणांत गांजाची लागवड केल्ल्या प्रकरणांत केरी पेडण्यां दुबावीत ऋषिकेश केरकार हाच्या घरा धाड घालून ताचे सयत हेर वांगड्यांक अटक केल्ली. त्या वेळार पुलिसांनी ताचे कडल्यान 1.08 कोटी रुपया मोलाचीं घुंवळे वखदां जप्त केल्ल्याचो दावो केल्लो. ह्या प्रकरणांतलो रामा आनी शिवाजी केरकार ह्या दोगांक मुंबय उच्च न्यायालयाच्या गोंय खंडपिठान दरेकी 1 लाख रुपया आनी हेर अटींचेर सशर्त जामीन मंजूर केला.
पेडणें पुलिसांनी 18 ऑक्टोबर 2020 दिसा केरी पेडणें हांगा ऋषिकेश केरकार हाच्या घरा धाड घाल्ली. त्या वेळार पुलिसांनी 1 कोटी 8 लाख 50 हजार रुपया मोलाचो 2.29 कील वजनाची लागवड केल्ली केनाबीस रोंपां, 1 कील 327 ग्राम गांजो आनी 2 कील 556 ग्राम चरस जप्त केल्लो.
ह्या प्रकरणांत पेडणें पुलिसांनी दुबावीत ऋषिकेश केरकार, रश्मी केरकार, रामा केरकार आनी शिवाजी केरकार ह्या चार जाणांक अटक केल्ली. पुलिसांनी दुबावितां आड घुंवळे वखदां विरोधी कायद्याच्या 1985 कलमा खाला गुन्यांव दाखल केल्लो.
उपरांत दुबावितांक न्यायालयान पयलीं पुलीस कोठयेंत धाडलें. ती सोंपले उपरांत न्यायालयान तांकां न्यायालयीन कोठयेंत धाडून दिलें. पुलिसांनी पेडणेंच्या पयलो वर्ग न्यायालयांत आरोपपत्र दाखल केलां. ड्रग्स प्रकरण सत्र न्यायालयाच्या अधिकारक्षेत्रांत येनाशिल्ल्यान सत्र न्यायालयांत वर्ग केलें. उपरांत दुबावीत ऋषिकेश केरकार हाचे सयत रश्मी केरकार ह्या दोगांक न्यायालयान सशर्त जामीन मंजूर केल्लो. उपरांत दुबावीत रामा आनी शिवाजी केरकार ह्या दोगांनी पयलीं दोन फावटी दाखल केल्लो जामीन अर्ज न्यायालयान भायरायिल्लो. उपरांत दुबावीत रामा आनी शिवाजी केरकार हांणी मुंबय उच्च न्यायालयाच्या गोंय खंडपिठांत जामीन अर्ज दाखल केलाे.
ह्या प्रकरणांतले दोनूय दुबावीत अडेज वर्सां परस चड काळ कोठयेंत आसात. तशेंच हातूंत 18 साक्षिदार आसून तातूंतल्या फक्त तिगां साक्षिदारांची उरफाटी तपासणी जाल्या. ताका लागून ह्या खटल्याचे सुनावणेक दीर्घकाळ लागतलो असो युक्तीवाद अॅड. रोहन देसाय हांणी दुबाविता वतीन केलो.
हाची दखल घेवन न्या. मकरंद एस. कर्णीक हांणी दोगांक दरेकी एक लाख रुपया, तितलेच रकमेचो एक वा दोन हमिदार, दर म्हयन्याच्या पयल्या सोमारा पेडणें पुलीस स्टेशनार हजेरी लावप आनी हेर अटींचेर सशर्त जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
