भांगरभूंय | प्रतिनिधी
सावंत मारपेट प्रकरणः वास्कोच्या वकिलांची कारवायेची मागणी
भांगरभूंय । प्रतिनिधी
म्हापशेंः अॅड गजानन सांवत हांका मारपेट प्रकरणांतल्या पर्वरी पुलीस स्टेशनांतल्या दुबावीत पुलिसांक अजून अटक जाली ना. देखून आयच्यान (मंगळार 13 डिसेंबर) पुलीस खात्याच्या गुन्यांव फांट्याच्या रायबंदर हांगच्या कार्यालया सामकार मोने धरणे आंदोलन करपाचो निर्णय वकील संघटनांनी घेतला. उत्तर आनी दक्षीण गोंयांतल्या अॅडव्होकेट फोरमाचे वकील ह्या आंदोलनांत वांटो घेतले.
सोमाराक सांज म्हापश्यांत अॅडव्होकेट फोरमाची बसका जाली. जो मेरेन दुबावीत पुलिसांक निलंबीत करनात वा अटक करनात तो मेरेन हें धरणे आंदोलन चालू दवोरपाचो थाराव हे बसकेंत घेतला. उत्तर आनी दक्षीण गोंयांतल्या अॅडव्होकेट फोरमांनी मारपेट प्रकरणातल्या दुबावीत पुलिसांची अटक तशेंच निलंबनाची मागणी केल्ली. ते खातीर पुलीस यंत्रणेक जाय तितलो वेळ दिलो. तरीय अजून कारवाय जाली ना. ताका लागून मंगळाराक सकाळीं 11 वरां सावन गुन्यांव फाट्याच्या कार्यालया सामकार आनी मोने धरणे आंदोलन सुरू करतले अशें बसके उपरांत म्हापशें अॅडव्होकेट फोरमाचो अध्यक्ष अॅड परेश राव हांणी पत्रकारांक सांगलें.
अॅड सावंत हांका मारपेट करपी पुलिसांक बेगोबेग निलंबीत करून खर कारवाय करची अशी आमची सरकारा कडेन मागणी आसा. अॅड गजानन सावंत हे फाटल्या वीस वर्सां सावन वकिली करतात. तांचो सभाव आनी प्रतिश्ठा सगळ्यांक तशेंय न्याय पालिकेक लेगीत खबर आसा. पुलिसां कडेन अरेरावी करपाक ते नवे वकील न्हय. अशे व्यक्तीक पुलीस मारपेट करतात ही दुर्दैवी घडणूक आसा अशें तांणी सांगलें. वकील मारपेट प्रकरणाच्या गुन्यांवांत आयपीसीचें 307 कलम जोडलां तरीय संबंदीत पुलिसांक अटक केली ना. हाचे वयल्यान पुलीस खातें आपल्या कर्मचाऱ्यांक संरक्षण दिता असो जाता. दुबावीत पुलीस संदीप परब हाचेर कोणाचो वरदहस्त आसा असो प्रश्न अॅड विनायक पोरोब हांणी विचारला.
मजगती, ह्या मारपेट घडणुकेची सीसीटीव्ही फुटेज आनी मोबायलाचेर काडिल्लो व्हिडिओ सध्या सोशल मीडियाचेर व्हायरल जाता. अॅड सावंत पुलिसाच्या कानसुलार मारतात आनी पळटात आनी पुलीस तांच्या फाटल्यान धांवतात अशें व्हिडिओंतल्यान दिसता.
वास्कोतल्या वकिलांची मागणी
मुरगांवः अॅड गजानन सावंत हांका पुलिसांनी केल्ल्या मारपेटाचो वास्को अॅडव्होकेट असोसिएशनान निशेध केला. अॅड चेतन पालयेकार हांच्या फुडारपणा खाला असोसिएशनान दुबावितांचेर बेगोबेग कारवाय करपाची मागणी केल्या. गुन्यांव नोंद जातगीर संबंदीत पुलिसांक निलंबीत करपाक जाय आशिल्लें. पुलीस यंत्रणा आनी गुन्यांव फांटो दुबाबीत गुन्यांवकारांक संरक्षण दिवपाचो यत्न करतात अशें दिसून येता. ताकां निलंबीत केलें ना जाल्यार ते पुरावे ना करपाक शकतात अशें असोसिएशनान म्हणलां. ह्या प्रकरणांत पुलीस खात्यान घाळपणा केल्यार कोणूय वकील न्यायालयांत पुलिसांची बाजू मांडचो ना अशी शिटकावणी अॅड चेतन पालयेकारान दिल्या. अॅड मोरीन आब्रुव, अॅड अमेय शेट्ये, अॅड सोनिया रेडकार, अॅड विमनी रेडकार, अॅड गणेश कांबली, अॅड दिलेश्वर नायक हांणी दुबावीत पुलिसांचेर कारवाय करपाची मागणी केल्या.
प्रकरण सीबीआय कडेन दियात
फोंडेंः अॅड सावंत मारपेट प्रकरण चवकशे खातीर सीबीआय कडेन दिवपाची मागणी फोंडें वकील संघटनेन केल्या. ह्या प्रकरणात पर्वरी पुलीस स्टेशनाच्या निरीक्षकाचो लेगीत हात आसा अशें दिसता. ताका लागून सीबीआय वरवी चवकशी करपाची आमची मागणी आसा अशें संघटनेचो अध्यक्ष अॅड नेल्सन सुवारीस हांणी सांगलें. संबंदीत पुलिसांक निलंबीत केलें ना जाल्यार खर आंदोलन करपाची शिटकावणी तांणी दिल्या.
सध्या पुलिसां कडल्यान अॅड सावंत हांची सतावणूक चल्ल्या अशी कागाळ संघटनेन सोमाराक घेतिल्ले पत्रकार परिशदेंत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
