भांगरभूंय | प्रतिनिधी
फोंडें, प्रतfनिधी: किर्लपाल पंचायतींत बोगस पावत्यो प्रकरणांत दिसान दीस एक नवीच म्हायती उक्ताडार येवपाक लागल्या. 2017 वर्सा बनावट पावत्यांचें प्रकरण उजवाडाक हाडल्या उपरांत गट विकास अधिकार्यान रोखडीच सचीव आनी कारकुनाची बदली केल्ली. तेन्ना कारकुनान आपले चुकीचो कबूलनामो तेन्नाच्या सरपंचा कडेन दिल्लो. ताका लागून नव्या वर्सा दोशींचेर कारवाय जावपाची अपेक्षा लोकांक आसा.
सावर्डे काँग्रेस गट समितीचे अध्यक्ष जयेश पाटील आनी हेर पदाधिकार्यांनी शुक्रारा गट विकास अधिकार्याची भेट घेवपाचो यत्न केलो. पूण कांय कामां खातीर ते पणजे गेल्ल्यान भेट जावंक ना. तेन्ना चड म्हायती दितना जयेश पाटील हांणी पंचायतींतल्या कारकुनान परत पंचायत कार्यालयांत बदली करून घेवपा खातीर गुन्यांव केल्ल्याचो कबूलनामो 20 जानेवारी 2018 दिसा दिल्लो. पूण अधिकार्यांनी तेन्ना ताच्या कबूलनाम्या संबंदी कारवाय करूंक नाशिल्ली. पूण फाटल्या वर्सभर पंचायत कार्यालयांत परत बोगस पावत्यो लोकांक मेळूंक लागिल्ल्यान खुबश्या येवजण्यांचो लाव मेळना. ताका लागून बनावट पावत्यो दिवपाचेर खरांतली खर कारवाय जावप गरजेचें अशें सांगलें.
पंचायतींत बोगस पावत्यांचो घोटाळा सरपंच दामोदर बांदेकार हांणी कांय दिसां आदीं उक्ताडार हाडिल्लो. पूण राजकीय चेंपणा खाला सरपंचान राजिनामो दिवन हात वयर केले. ताका लागून सावर्डे काँग्रेस गट समितीन उपसंचालका कडेन कागाळ दाखल केल्या. आतां मेरेन चवकशी सुरू जावंक नाशिल्ल्यान म्हत्वाचीं कागदपत्रां ना जावपाची शक्यताय आसा. तातूंत पंचायत सचीव आनी कारकून फाटल्या 2- 3 दिसां सावन कार्यालयांत दिसनात. ह्या प्रकरणाची खोलायेन चवकशी करपाची गरज आशिल्ल्याचें जयेश पाटील हांणी सांगलें.
ह्या वेळार तांचे वांगडा संकेत भंडारी, गौतम भंडारी आनी राजेंद्र भंडारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
