भांगरभूंय | प्रतिनिधी
फोंडें, प्रतिनिधी: किर्लपाल पंचायतींत बोगस पावत्यो दिल्ल्याचो घोटाळो उक्ताडार हाडपी सरपंचान राजिनामो दिला. पूण बोगस पावत्यांक लागून पंचायत वाठारांतल्या खुबश्या लोकांक अटल आश्रय यवजणेचो लाव घेवपाक मेळचो ना. पंचायतींतल्या कांय कर्मचार्यांच्या बेभरंवश्याच्या कामाक लागून घर क्रमांक ना, रक्कम गेली पूण हातांत उरल्यो त्यो बोगस पावत्यो अशें म्हणपाचो वेळ लोकांचेर आयला.
किर्लपाल पंचायतींत बनावट घर क्रमांक आनी बनावट घर पट्टीच्या पावत्यांक लागून लोकांक अटल आश्रय येवजणेचो लाव घेवपाक मेळना. बोगस घर पट्टीच्या पावत्यांक लागून खुबश्या लावार्थ्यांच्यो फायली खात्या कडेन पडून आशिल्ल्याची म्हायती उक्ताडार आयल्या. लोकांनी अटल आश्रय येवजणेचो लाव घेवपा खातीर गरजेचीं कामां पुराय केल्लीं. पूण येवजणेचो लाव घेवपा खातीर नव्या घरपट्टी पावतीची गरज आसता. नवी पावती घेवपा खातीर पंचायत कार्यालयांत गेल्या उपरांत खुबश्या लोकांचे घर क्रमांक नोंद नाशिल्ल्याचें कळ्ळां. पंचायत कार्यालयांत घर क्रमांक नोंद नाशिल्ल्यान खुबश्या जाणांनी घर क्रमांक दिवपा खातीर रक्कम घेतिल्ल्या कारकुना कडेन चवकशी केल्ली. पूण ताणें हात वयर केले. लावार्थ्यांची रक्कम गेली.
अटल आश्रय येवजणे खातीर घर पट्टीच्यो पावत्यो म्हत्वाच्यो. पूण किर्लपाल पंचायतींत जाल्लो बोगस पावत्यांचो घोटाळो लावार्थ्यां खातीर त्रासाचो थारला. बोगस पावत्यो दिवपी कर्मचार्यांक संरक्षण दिवपाचें सोडून सरकारान कारवाय करपाची मागणी लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
