भांगरभूंय | प्रतिनिधी
काँग्रेसीची मागणीः दोन कोटी रुपयांची भानगड प्रकरणांत पेडणें पुलीस स्टेशनाचेर कागाळ दाखल
भांगरभूंय । प्रतिनिधी
पेडणें: पेडणेंच्या अबकारी कार्यालयांत सुमार दोन कोटी रुपयांची भानगड जाल्या. ह्या प्रकरणाक जापसालदार आशिल्ले अव्वल कारकून हरीश प्रभाकर नायक आनी अबकारी खात्याचे कमिशनर नारायण गाड हांचे आड काँग्रेस पक्षाचे म्हणयारे तशेंच समाज वावुरपी संजय बर्डे हांणी पेडणें पुलिशेंत कागाळ दाखल केल्या. तशेंच दोगांकूय अटक करची अशी मागणी केल्या.
पत्रकारां कडेन उलयतना बर्डे हांणी सांगलें, अबकारी खात्याचे कमिशनर नारायण गाड हांकां जेन्ना हो प्रकार कळ्ळो तेन्ना तांणी रोखड्यारोखडी पेडणें पुलीस स्टेशनाचेर कागाळ करप गरजेचें आशिल्लें. मात तांणी तशें करिनासतना त्या कर्मचाऱ्याक सांबाळून घेवन ताची बदला सत्तरी केली. ह्या प्रकारा वयल्यान ह्या प्रकरणाक नारायण गाड हेवूय तितलेच जापसालदार आसात आनी तांचोय ह्या कारस्थानांत आस्पाव आसा, अशें बर्डे हांणी सांगलें. मुख्यमंत्री डॉ. प्रमोद सावंत हांचे कडेन हें खातें आसा. तांणी ह्या प्रकरणांत खोलायेन चवकशी करून सत लोकां मुखार हाडचें. ह्या प्रकारा फाटल्यान हरीश प्रभाकर नायक एकटोच आसचो ना. खात्याच्या वरिश्ठ अधिकाऱ्यांचो तेंको आसले बगर इतली व्हड भानगड जावपाकूच शकना. मांद्रें मोरजी वाठारांतल्या 80 बार धनयां कडल्यान नुतनीकरण तशेंच परवान्या खातीर पयशे घेवन बनावट पावती दिवपाचें धाडस ताका जालें. ताणें लोकांच्या पयशांची आनी सरकारी तिजोरेची लूट केल्या. ह्या प्रकरणाची खोलायेन चवकशी जावप गरजेचें आसा, अशें बर्डे हांणी सांगलें.
तपासणी नाक्यार चलता नाटक
पेडणें म्हालांत राष्ट्रीय म्हामार्गा वयल्यान आनी सदांकाळ उक्ते आशिल्ल्या तपासणी नाक्या वयल्यान व्हड प्रमाणांत सोऱ्यांनी भरिल्ल्यो गाडयो दरदिसा वतात. मात नांवापुरती एकादी गाडी धरून कारवाय केल्ल्याचें नाटक हे अबकारी कार्यालयांतले कर्मचारी आनी अधिकारी करतात. पेडणेंच्या प्रकारा वयल्यान प्रशासन कशें चल्लां तें कळटा, अशें संजय बर्डे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
