भांगरभूंय | प्रतिनिधी
भांगरभूंय । प्रतिनिधी
शिवोलीः कामुर्ली हांगा एके दोंगुल्लेचेर सुरू आशिल्ल्या रहिवाशी प्रकल्पाच्या बांदकामाक थळाव्या लोकांनी विरोध केला. शुक्राराक कामुर्ली पंचायत कार्यालयांत वचून खंयचेय परिस्थितींत व्हो प्रकल्प जावपाक दिवचे नात अशें पंचायत मंडळाक सांगलें.
रिव्होल्युशनरी गोवन्स पक्षाचे मनोज परब हाच्या फुडारपणा खाला पंचायत कार्यालयांत आशिल्ल्या लोकांनी सुमार 400 ग्रामस्थांच्यो सयो आशिल्लें प्रकल्पाक विरोध करपी निवेदन सरपंचाक भेटयलें. प्रकल्पा विशींच्या पंचायत मंडळाचे भूमिके विशीं दुबाव उक्तावन प्रकल्पाक पंचायतीन दिल्ले सगले परवाने बेगोबेग रद्द करपाची मागणी तांणी केली.
दोंगुल्लेचेर जावपाक घातिल्ल्या ह्या रहिवाशी प्रकल्पाक लागून कामुर्ली गांवांतल्या घरांक धोको उप्रासपाची शक्यताय आशिल्ल्यान ताचेर चर्चा करपा खातीर खाशेली ग्रामसभा घेवपाची मागणी ग्रामस्थांनी केल्या. पंचायतीन प्रकल्पा विशीं घेतिल्ले भूमिकेचें सरपंच पांडुरंग खोर्जुवेकारान समर्थन करपाचो यन्त केलो, मात ग्रामस्थांचें समाधान जावपाक शकलें ना. तांणी सरपंचाच्या राजिनाम्याची मागणी केली.
व्हडल्या रहिवाशी प्रकल्पा खातीर 25 मीटर रुंद रस्त्याची गरज आसता. प्रादेशीक आराखड्यांत मुरली तें ओशेल मेरेन 25 मीटरांचो रस्तो दाखयला तो असल्याच प्रकल्पां खातीर आसा. व्हो रस्तो तयार करपा खातीर कामुर्लेंतली जायती घऱां मोडचीं पडटलीं अशे मनोज परब हाणे लोकांक सांगलें. गोंय सरकारान केल्ल्या कायद्या प्रमाण रस्ता कुशीक आशिल्ल्या घर धनयांक घऱ मोडपाविशीं फकत एक म्हयन्याची मुजत दितले अशी म्हायती ताणे दिली. सरकारान सत्तरी तालुक्यांत शेळ मेळावली हांगा आयआयटी प्रकल्प हाडपाक पळयलो तेन्ना थळाव्या लोकांनी ताका विरोध करून प्रकल्प जावपाक दिलो ना. कामुर्लीचे लोक एकवोटान रहिवाशी प्रकल्प जावपाक दिवचे नात. वेळ आयल्यार न्यायालयांत वतले अशें मनोज परब हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
