भांगरभूंय | प्रतिनिधी
काणकोण: समृद्ध भारत करपा खातीर गोंयांतल्या गरिबांतले गरीब घर लेगीत समृद्ध जावंक जाय. ‘संस्कृतीक दायज’ आशिल्लो समाज घडूंक जाय. ते नदरेन मुख्यमंत्री डॉ. प्रमोद सावंत हांच्या फुडारपणा खाला विकासाची वाटचाल सुरू आसा. 200 कोटी रुपयांच्यो विवीध येवजण्यो काणकोणकारांक दितले अशें वीज मंत्री सुदिन ढवळीकार हांणी सांगलें.
काणकोणच्या उपजिल्होधिकारी कचेरे कुशीक आयोजीत केल्ल्या गोंयच्या 61व्या मुक्ती दीस सुवाळ्यांत ते मुखेल सोयरे म्हूण उलयताले.
ह्या वेळार माचयेर नगराध्यक्ष रमाकांत नायक गांवकार, उपनगराध्यक्ष लक्ष्मण पागी, नगरसेवक सायमन रेबेलो, धिरज नायक गांवकार, नितू देसाय, सारा देसाय, हेमंत नायक गांवकार, अमिता पागी, सुप्रिया देसाय, उपजिल्होधिकारी रमेश गांवकार, मामलेदार मनोज कोरगांवकार, पुलीस उपअधिक्षक संदेश चोडणकार, निरिक्षक चंद्रकांत गांवस, स्वातंत्र सैनिकांच्यो घरकान्नी, विविध सरकारी कचेरेचे अधिकारी आनी कर्मचारी, विवीध विद्यालयाचे विद्यार्थी आनी शिक्षक हाजीर आशिल्ले.
गोंयची उदरगत भाऊसायब बांदोडकारान केली. तांणी शाळा, एमआरएफ, गोवा शिपयार्ड, संजिवनी साकर कारखानो गोंयांत हाडले. कूळ मुंडकार कायदो लेगीत भाऊंच्या वेळार अस्तित्वांत आयलो. लोकांक शिक्षण दिवपा खातीर गोंया भायल्या शिक्षकांक हाडून गोंयकारांक शिक्षण दिलें म्हणून आमी घडले. गोंयच्या विकासाचें स्रय गोंयांतल्या दरेक मुख्यमंत्र्याक वता. काणकोणच्या स. मनोहर पर्रीकार बायपास रस्त्याचें स्रय मनोहर पर्रीकार, विजय पै खोत, इजिदोर फर्नांडीस आनी आपणा सयत रमेश तवडकार हांकां वता अशें सुदिन ढवळीकार हांणी सांगलें.
सुरवातेक ढवळीकार हांणी बावटो हुबयलो. तांकां उपनिरिक्षक रामचंद्र नायक हांणी मानवंदना दिली. तशेंच कात्यानी बाणेश्वर, सेंट तेरेझा हायस्कूल, मल्लिकार्जुन हायस्कूल, जवाहर नवोदय विद्यालयाच्या विद्यार्थ्यांनी मानवंदना दिली.
ह्या वेळार मुठाळ अंगणवाडी, साळेरी अंगणवाडी, बालभवन केंद्र काणकोण हांणी नाच सादर केले. ताचे पयलीं मामलेदार आनी उपजिल्होधिकारी कचेरेंतल्या कर्मचाऱ्यांनी स्फूर्तिगीत गायलें. कार्यावळीचें सुत्रसंचालन शिरीष पै हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
