भांगरभूंय | प्रतिनिधी
पणजी: कळंगूट पंचायतीची बाल ग्रामसभा काल (आयतारा) व्हड उमेदीन जाली. हे ग्रामसभेंत शाळेंतल्या विद्यार्थ्यांनी वांटो घेवन विवीध प्रस्न पंचायत मंडळा मुखार मांडले.
भौशीक सुवातेर बसून लोक सोरो पियेतात. हॉटेल-रिसॉर्टांतलें घाण उदक रस्त्यार सोडून वाठार घाण करप ह्या सारक्या विशयांक हात घालून बाल ग्रामसभा वांगड्यांनी आवाज काडलो.
तशेंच विद्यार्थ्यांनी संवसारा मुखार भेडसायत आशिल्ल्या नितळ उदकाची समस्या मांडली. विद्यार्थ्यांच्या प्रस्नांचेर सरपंच जोजफ सिक्वेरा आनी पंचायत वांगड्यांनी समाधानकारक जापो दिवपाचो यत्न केलो. विद्यार्थ्यांनी विचारिल्ले प्रस्न आनी विद्यार्थ्यांक आपल्या वाठारा विशीं आशिल्ली सजगताय हाची व्हड प्रमाणांत तोखणाय जायत आसा. विद्यार्थ्यांनी चडांत चड प्रस्न विचारचे हे खातीर कोंकणी, मराठी, हिंदी, इंग्लीश भाशेंतल्यान प्रस्न विचारपाची मेकळीक दिल्ली.
विद्यार्थ्यांची उणीं उपस्थिती पळोवन सरपंच जोजफ सिक्वेरान ही ग्रामसभा मुखार धुकलून 22 जुलय दिसा निश्चीत केली. पंचायत मंडळान आयोजीत केल्ले हे ग्रामसभेचें सगली कडेन तोखणाय जायत आसा. हातूंत विद्यार्थ्यांक विवीध प्रस्न मांडपाची संद मेळ्ळी. हे संदीचो विद्यार्थ्यांनी पुरेपूर फायदो घेवन समाजा कडेन संबंदीत प्रस्न तांणी पंचायत मंडळा मुखार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
