भांगरभूंय | प्रतिनिधी
म्हापशें: कळंगूट पुलिसांनी गौरावाड्यार घुंवळे वखदां आडचे कारवाये खाला दुबावीत ऑस्टीन आबेल डिसोझा (39, रा. उमतावाडो, कळंगूट) हाका अटक केल्या आनी ताचे कडल्यान 90 हजारांचें हेरॉयन आनी महिंद्रा थार जीप मेळून 16 लाखांचो म्हाल जप्त केला.
पुलिसांनी ही कारवाय मंगळारा सकाळीं केली. खात्रेच्या गोपां कडल्यान मेळिल्ले म्हायतीच्या आदारान पुलीस पंगडान गौरावाडो कळंगूटे पीझा हट लागीं दुबाविताची जीए 03 एएफ 1289 क्रमांकाची थार जीप आडायली. झडटे वेळार जिपींत 9 ग्राम हेरॉयन हें घुंवळे वखद मेळ्ळें.
दुबाविता आड घुंवळे वखदां प्रतिबंधक कायद्या खाला गुन्यांव नोंद करून पुलिसांनी ड्रग्सा सयत वयली जीप मेळून 16 लाखांचो म्हाल जप्त केलो.
मजगतीं, दुबावीत आरोपीक कळंगूट पुलिसांनी फाटल्या 2017 वर्सा अशाच ड्रग्स प्रकरणांत अटक केल्ली. जाल्यार दुबाविताच्या बापायचो लेगीत ड्रग्स विक्री वेव्हारांत आस्पाव आसा अशी म्हायती पुलीस अधिकाऱ्यांनी दिली.
पुलीस अधिक्षक निधीन वाल्सन, उपअधिक्षक विश्वेश कर्पे, निरिक्षक दत्तगुरू सावंत हांंच्या मार्गदर्शना खाला उपनिरिक्षक रमेश हरिजन, हवालदार विद्यानंद आमोणकार, मनोज नायक, कॉन्सटेबल आकाश नायक, विजय नायक, गणपत तिळोजी, अमीर गरड आनी लक्ष्मण पटेकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
