भांगरभूंय | प्रतिनिधी
पणजी: विधानसभा अधिवेशनाचे सुरवेकूच कला अकादमीचो भाग कोसळिल्ल्या प्रस्नाचेर आनी आडखळून उरिल्ल्या प्रस्तावांचेर चर्चा करची म्हणून विरोधकांनी बोवाळ केलो. ताका लागून सभापतीन 11.45 वरांचेर सभागृहाचें कामकाज अर्ध्या वरा खातीर फुडें धुकल्लें. विधानसभा अधिवेशन बोवाळान सुरू जालें. कला अकादेमीच्या स्थगन प्रस्तावाचेर चर्चा करपाची मागणी करून विरोधी आमदारांनी सभापती मुखार निशेध केलो. प्रस्न- जाप वरा उपरांत स्पश्टीकरण दितलों, अशी हमी मुख्यमंत्र्यान दिली.
अर्द वरां उपरांत परत विधानसभा अधिवेशनाक सुरवात जाल्या उपरांत मुख्यमंत्री डॉ. सावंत हांणी निवेदन सादर करीत सांगलें, कोसळिल्लें बांदकाम 43 वर्सां पोन्नें आशिल्लें. मदीं ताका तेंको नाशिल्लो. जे कोण दोशी आसात तांचेर कारवाय जातली. एकटोय दोशी सुटचो ना.
उपरांत आमदार विरेश बोरकार हांणी आपल्या मतदारसंघांतल्या हाउसिंग बोर्डाचे जमनी वयल्या अतिक्रमणाचो प्रस्न मांडलो. ताचेर जाप दितना मंत्री सुदीन ढवळीकार हांणी सांगलें, अनवळखी मनशा आड कागाळ केल्या. पुलिसांनी ह्या प्रकरणाची चवकशी सुरू केल्या.
आमदार विजय सरदेसाय हांणी राज्यांत टोमॅटो आनी मिरसांगेच्या वाडपी दरा विशीं उल्लेख केला. मंत्री रवी नायक हांणी दर कुटुंबाक टोमाटाची पुरवण करची अशें आश्वासन दिवचें अशी मागणी तांणी केली. हाचेर मंत्री रवी नायक हांणी आमी सगळ्या भाजयांची पुरवण फळ उत्पादन मंडळा वरवीं करतात अशें सांगलें.
बालरथ कर्मचार्यांक 12 म्हयन्यांचो पगार मेळटलो. तातूंत 3 टक्के वाड जातली. चालक बदलपाक मेळचो ना. संप फाटीं घेवपाचें आस्वासन कर्मचार्यांच्या फुडार्यांनी दिलां, अशें ह्या वेळार मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
