भांगरभूंय | प्रतिनिधी
-म्हालेखापाल अहवालांतलो निश्कर्श
– पगार 23.15 टक्के
– पेन्शन 12.99 टक्के
– कळंतर 12.53 टक्के
पणजी : सरकाराक मेळपी वट्ट महसुलांतल्यान कर्मचाऱ्यांचो पगार, पेन्शन तशेंच रिणाच्या कळंतराचेर 2021-22 वर्सा 49 टक्के खर्च जाला. पगाराचेर 23 टक्के, पेन्शनाचेर 13 टक्के जाल्यार रिणाच्या कळंतराचेर 13 टक्के खर्च जाल्ल्याची नोंद म्हालेखापालाच्या अहवालांत आसा. फाटल्या पांच वर्सांत हो खर्च सुमार सारकोच आशिल्लो, पूण प्रमाण चड आशिल्ल्याचे अहवालांत नमूद केलां.
सरकारी कर्मचाऱ्यांचो पगार, पेन्शन तशेंच रिणा वयल्या कळंतराचेर खर्च करचोच पडटा. हो खर्च वाडलो जाल्यार मुळाव्यो सुविधा, कल्याणकारी येवजण्यो तशेंच हेर खर्चा खातीर निधी उणो पडटा. फाटल्या पांच वर्सांचो विचार केलो जाल्यार पगार तशेंच पेन्शना वयलो खर्च दरेक वर्सा वाडत गेला.
पगाराचेर 3,293 कोटींचो खर्च
2021-22 वर्सा पगाराचेर 3,293.65 कोटी रुपया खर्च जाला. हो खर्च 2020-21 चे तुळेंत चड आसा. 2020-21 वर्सा पगाराचेर 2,959.15 कोटी रुपया खर्च जाल्लो. कर्मचाऱ्यांचो पगार वर्सा प्रमाण वाडटा. तसो हो खर्च लेगीत वाडटा. 2017-18 वर्सा पगाराचेर 2,827.20 कोटी, 2018-19 वर्सा 2,798.54 कोटी जाल्यार 2019-20 वर्सा 2,935.36 कोटी रुपया खर्च जाला.
पेन्शनाचेर 1,848 कोटींचो खर्च
निवृत्त कर्मचाऱ्यांच्या पेन्शनाचेर 2021-22 वर्सा 1,848.43 कोटी रुपया खर्च जाला. पेन्शना वयलो खर्च लेगीत वर्सा प्रमाण वाडला. 2017-18 वर्सा पेन्शनाचेर 1,163.59 कोटी, 2018-19 वर्सा 1,299.13 कोटी रुपया खर्च जाला. 2019-20 वर्सा पेन्शनाचेर 1,313.18 कोटी रुपया आनी 2020-21 वर्सा पेन्शनाचेर 1,412.23 कोटी रुपया खर्च जाल्यात.
रिणाच्या कळंतराचेर 1,782 कोटी खर्च
रिणाच्या कळंतराचेर 2021-22 वर्सा 1,782.53 कोटी रुपया खर्च जाल्यात. 2017-18 वर्सा कळंतराचेर 1,244.28, 2018-19 वर्सा 1,344.45 कोटी, 2019-20 वर्सा 1,465.09 जाल्यार 2020-21 वर्सा 1,590.37 कोटी रुपया कळंतराचेर खर्च जाल्यात.
टक्केवारीचो विचार केलो जाल्यार 2020-21 वर्सा पगार, पेन्शन आनी कळंतर मेळून वट्ट खर्चाच्या 48.67 टक्के रक्कम खर्च जाल्या. 2020-21 वर्सा ही टक्केवारी 49.30 टक्के, 2019-20 वर्सा 49.17 टक्के आशिल्ली. 2018-19 वर्सा पगार, पेन्शन आनी कळंतराच्या खर्चाचें प्रमाण 49.10 टक्के आनी 2017-18 वर्सा ते 49.65 टक्के आशिल्ले.
5 वर्सांत पगारा वयलो खर्च
वर्स खर्च
2017-18 /2,827.20 कोटी
2018 -19 /2,798.54 कोटी
2019-20 /2,935.36 कोटी
2020-21 /2,959.15 कोटी
2021-22 /3,293.65 कोटी
5 वर्सांत पेन्शना वयलो खर्च
वर्स खर्च
2017-18 /1,163.59 कोटी
2018-19 /1,299.13 कोटी
2019-20 /1,313.18 कोटी
2020 -21 /1,412.23 कोटी
2021-22 /1,848.43 कोटी
5 वर्सांत पगारा वयल्या खर्चाची टक्केवारी
वर्स टक्केवारी
2017-18 /26.82%
2018-19 /25.25%
2019-20 /25.26%
2020-21 /24.47%
2021-22 /23.15%
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
