भांगरभूंय | प्रतिनिधी
मेळत त्या वाहनांनी करचो पडटा प्रवास
म्हापशें: सुर्ल, सत्तरी ते पणजी मार्गा वयली कदंब बस सेवा फाटल्या कांय म्हयन्यां सावन सेगीत खंडीत जायत आसा. फाटले तीन दीस बस येनाशिल्ल्यान विद्यार्थ्यां मुखार व्हड समस्या निर्माण जाल्या. कदंब म्हामंडळान बस सेवा सुरळीत करून ही समस्या पयस करची अशी मागणी पालकांनी केल्या.
ह्या गांवांतल्या विद्यार्थ्यांक शिक्षणा खातीर पर्यां आनी सांखळे वच्चें पडटा. गांवांत येवपी कदंब बस हीच ह्या विद्यार्थ्यांचे मुखेल येरादारीचें साधन. पूण फाटल्या कांय म्हयन्यां सावन ही बस सेवा बेभरवंशाची थारल्या. खूबशे फावटी कदंब बस कर्मचारी सुर्ला वचनासतना केरी सत्तरींत रातच्या वेळार बशीचो थांबो घेतात, आनी सकाळीं थंय सावनूच फुडल्या मार्गार बस सोडटात.
ही बस येवंक नाशिल्ल्यान विद्यार्थ्यांक शाळेंत वचपा खातीर चोर्ला-बेळगांव मुखेल रस्त्यार येवचें पडटा. सद्या कदंब म्हामंडळान पणजी ते बेळगांव वचपी सगल्योच कदंब बस सेवा खंडीत केल्यात. कर्नाटक एसटी सेवाय वेळार मेळना. तशेंच एसटी बशींतलो प्रवास विद्यार्थ्यांक परवडपी ना.
ताका लागून ह्या भुरग्यांक जीव घाताक घालून म्हाल व्हरपी ट्रकांतल्यान प्रवास करचो पडटा. सद्या चोर्ला घांटात म्हाल व्हरपी ट्रकांक सेगीत अपघात घडत आसात. अशे स्थितीयूय ह्या भुरग्यांक शिक्षणा खातीर ह्या वाहनांनी वच्चें पडटा.
फाटल्या सोमारा सावन कदंब बस सुर्ला आयलीच ना. ग्रामस्थांनी कदंब म्हामंडळा कडेन संपर्क सादलो तेन्ना फावोतो कर्मचारी ना अशें सांगून वेळ काडपाचो यत्न केलो. म्हामंडळाच्या वेळकाडू धोरणाक लागून सुर्लातल्या विद्यार्थ्यांचें मात व्हड लुकसाण जायत आसा. सरकारान हाचे कडेन गंभीरतायेन लक्ष दिवचें आनी समस्येचेर उपाय काडचो अशी मागणी ग्रामस्थांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
