भांगरभूंय | प्रतिनिधी
विद्यार्थ्यांचे सुरक्षेचो प्रस्न भेडसायता पालकांक
फोंडें: ओपा-खांडेपारचें जंक्शन फाटल्या कांय वर्सां सावन अपघाताचें केंद्र थारलां. जंक्शनार व्हड संख्येन विद्यार्थी बशीची वाट पळयत आशिल्ल्यान सुरक्षेचो प्रस्न पालकांक भेडसायता. विद्यार्थ्यांचे सुरक्षे खातीर अर्दकुटें स्थितींत आशिल्ल्या पुलाचें काम पुराय करपाची मागणी थळावे लोक करीत आसात.
फाटल्या कांय वर्सां सावन जंक्शनार अपघाताचें प्रमाण वाडलां. अर्दकुटे स्थितींत आशिल्लो पूल अपघाताक खरें कारण मानतात. पूण अर्दकुटे स्थितींतल्या पुलाचें काम पुराय करपाक सरकार गंभीरपणान लक्ष दिना. ताका लागून चार रस्त्या वयल्या जंक्शनार सेगीत अपघात घडत आसतात.
पोरूं वर्सा अपघातांत विद्यार्थी जखमी जावपाची घडणूक घडिल्ली. फाटल्या सोमारा भिरांकूळ अपघात जावन 6 वाहनां अपघातांत सांपडिल्लीं. पूण सरकारान ताचे कडेन गंभीरतायेन लक्ष केन्नाच दिलें ना. ताचो फटको विद्यार्थ्यांक दनपारच्या वेळार जीव मुठींत घेवन घरा वचचें पडटा.
जंक्शन वाठारांत लोक व्हड संख्येन दीसपट्टे आसतात. तेच बरोबर खूबशो दुचाकीं रस्त्याचे कुशीक पार्क केल्ल्यो आसतात. पोरूं वर्सा एक म्हालान भरिल्लो ट्रक वाठारांतल्या हॉटेलांत घुसून अपघात घडिल्लो. अपघात आडावपा खातीर फक्त रखडिल्ल्या पुलाचें काम पुराय करपाची गरज आसा.
खांडेपार हायस्कुलांतले पालक शिक्षक संघाचे अध्यक्ष सूरज गरड हांणी म्हणलें, हें जंक्शन विद्यार्थ्यां खातीर दिसानदीस घातक थारत आसा. विद्यार्थ्यांची सुरक्षा हांगा दिसून येना. ताका लागून व्हड अपघात घडपाची शक्यताय आसा. अपघात आडावपा खातीर सरकारान नव्या पुलाचें रखडिल्लें काम पुराय करपाची गरज आसा. एखादो व्हड अपघात घडचे पयलीं सरकारान दखल घेवची अशी थळाव्या लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
