भांगरभूंय | प्रतिनिधी
पणजी: हैद्राबाद हांगा बोगस कॉल सेंटरा वरवीं नागरिकांची गुप्त म्हायती चोरून ऑनलायन फटवणूक प्रकरणांतल्या चार दुबावितांक गोंय पुलिसांच्या गुन्यांव फांट्याच्या पंगडान हणजूणें सावन ताब्यांत घेतले. ताब्यांत घेतिल्ल्या दुबावितांक उपरांत हैद्राबाद पुलिसांचे सुवादीन केले.
गोंय पुलिसांच्या गुन्यांव फांट्यान दिल्ले म्हायती प्रमाण बोगस कॉल सेंटरा वरवीं नागरिकांची गुप्त म्हायती चोरून ऑनलायन फटवणूक केल्ल्या प्रकरणांत हैद्राबाद पुलिसांनी दुबावितां आड गुन्यांव दाखल केल्लो. ते प्रमाण पुलिसांनी भादंसंच्या कलम 420 आनी म्हायती आनी तंत्रज्ञान कायद्याचें कलम 43 ए आनी 66 खाला गुन्यांव दाखल केल्लो.
आपले आड गुन्यांव दाखल जाल्ल्याची म्हायती कळटकूच संबंदीत दुबावीत हैद्राबाद सावन पळून गोंयांत आयिल्ल्याची म्हायती थंयच्या पुलिसांक मेळ्ळी. ते प्रमाण हैद्राबाद पुलिसांनी गोंय पुलिसांचो गुन्यांव फांटो आनी सायबर विभागा कडेन संपर्क सादून दुबावितांची म्हायती दिली.
ते प्रमाण गुन्यांव फांट्याचे पुलीस अधिक्षक निधीन वाल्सन, अतिरिक्त पुलीस अधिक्षक राजू रावत देसाय हांच्या मार्गदर्शना खाला पुलीस निरिक्षक नेथन आल्मेडा, हवालदार संदीप मडकयकार, कॉन्स्टेबल महाबळेश्वर सावंत, संदेश कांबळी आनी हे पंगडान बुधवारा हणजूण्या वचून नवी दिल्ली हांगासरले काफील अहमद, मोहम्मद झैनुल, मोहम्मद आसीफ आनी चिराग सोहनलाल ह्या दुबावितांक ताब्यांत घेतले.
उपरांत तांकां फुडले कारवाये खातीर हैद्राबाद पुलिसांचे सुवादीन केले. हैद्राबाद पुलिसांनी चार दुबावितांक अटक करून तांकां हस्तांतरण रिमांडार घेवन गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
