भांगरभूंय | प्रतिनिधी
वास्को: झुआरीनगरांतल्या एमईएस कला आनी वाणिज्य म्हाविद्यालयाच्या वाणिज्य विभागान बीकॉम विद्यार्थ्यां खातीर आयोजीत केल्ल्या ‘कायदो शिक्षण- भारतांतलो करियर पर्याय’ विशया वयले कार्यशाळेचो लाव सुमार 119 विद्यार्थ्यांनी घेतलो.
म्हाविद्यालयाचे प्राचार्य डॉ. मनस्वी कामत हांणी विद्यार्थ्यांक करियर पर्याय म्हूण कायद्याच्या म्हत्वाचेर म्हायती दिली. विद्यार्थ्यांक कायद्यांत करियर करपा खातीर प्रोत्साहन दिलें. विद्यार्थ्यांनी वेगळ्योवेगळ्यो सर्ती परिक्षा दिवच्यो अशें आवाहन तांणी केलें.
वाणिज्य विभागाच्यो मुखेली डॉ. संचेलियाना फारिया हांणी रिसोर्स पर्सन अॅड. कृष्णकांत हेगडे देसाय हांची वळख करून दिली.
डॉ. हेगडे दसाय हांणी विद्यार्थ्यांक कायद्यांतल्या विवीध करियरा संबंदी म्हायती दिली. केंद्रीय लोकसेवा आयोग आनी गोंय लोकसेवा आयोग ह्या सारक्या विवीध स्पर्धात्मक परिक्षा दिवपाचें आवाहन तांणी केलें. कायद्याचें म्हत्व फक्त खटले वा न्यायालयांत खटले लढोवपा पुरते मर्यादीत नात. सरकारी तशेंच गैरसरकारी संस्थांनी कायदेशीर सल्लागार म्हूण वकिलांची गरज आसा. बँको, वेपारी, कलाकार, खेळगडे, उद्देग तशेंच दरेकाक केन्ना ना केन्ना तरी वकिलाची गरज भासताच अशें तांणी सांगलें. विवीध कॉर्पोरेटरा खातीर कायदो कसो म्हत्वाचो आसतलो हे विशीं तांणी म्हायती दिली.
विद्यार्थिनी तनुजा धोंड हिणें येवकार दिलो. समन्वयक अॅड. तन्वी कुलकर्णी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
