भांगरभूंय | प्रतिनिधी
खंडपिठांत चुकीचें प्रतिज्ञापत्र केलें दाखल
पणजी: मटेरीयल रिकव्हरी फॅसिलिटी (एमआरएफ) उबारपा कडेन आडनदर करून चुकीचें प्रतिज्ञापत्र दाखल केल्ल्या प्रकरणांत हळदोणें पंचायतीच्या सरपंचाक मुंबय उच्च न्यायालयाच्या गोंय खंडपिठान काल (सोमारा) 25 हजार रुपयांचो दंड दिलो.
कोयराची समस्या सोडोवपा खातीर खंडपिठान गोंय कोयर वेवस्थापन म्हामंडळाचे (जीडब्ल्यूएमसी) वेवस्थापकी संचालक आनी हेर यंत्रणांचे समिती वतीन उपाय येवजण लागू केल्यात. ज्येश्ठ वकील नॉर्मा आल्वारीस हांची ‘अॅमिकस क्युरी’ म्हूण नेमणूक केल्या. ते समस्येचेर उपाय काडपा खातीर खंडपिठाक आदार करतात.
वयले समितीन नगरपालिका आनी पंचायतींत ‘एमआरएफ’ आनी ‘कम्पोस्टींग युनीट’ उबारपाक सांगलां. पूण खूबशो पंचायती समितीचे सुचोवणे कडेन आडनदर करीत आशिल्ल्याचें दिसून आयलां. हळदोणें पंचायत लेगीत एमआरएफा विशीं कसलीच पावलां उबारूंक नाशिल्ल्याचें तशेंच खंडपिठांत चुकीची म्हायती दिवन दिशाभूल करीत आशिल्ल्याचो दावो करून देविदास पणजीकार हांणी खंडपिठांत हस्तक्षेप याचिका दाखल केल्या.
हाची दखल घेवन खंडपिठान फाटले सुनावणे वेळार गोंय राज्य प्रदुशण नियंत्रण मंडळाक (जीएसपीसीबी) पळोवणी करपाची सुचोवणी केल्ली. ताचो अहवाल सोमारा सुनावणे वेळार मंडळान खंडपिठांत सादर केलो. ह्या सुनावणे वेळार हळदोणें पंचायतीचे सरपंच आनी सचीव न्यायालयांत हजर आशिल्ले.
पंचायतीचो दावो जीएसपीबीसीन काडलो खोडून
* खंडपिठाच्या आदेशा प्रमाण जीएसपीसीबीन 30 वेर हळदोणेंच्या एमआरएफची पळोवणी केली तेन्ना तें बंद आशिल्ल्याचें दिसून आयलें. हीच म्हायती सोमारा खंडपिठांत दिली.
* सरपंचान प्रतिज्ञापत्र सादर करून सगले वेवस्थीत आशिल्ल्याचो दावो केलो. तशेंच जीएसपीसीबीचो दावो फटीचो आशिल्ल्याचें नमूद केलें.
* हेच सुनावणेंत जीएसपीसीबीन पंचायतीचो दावो फटीचो आशिल्ल्याचें खंडपिठाचे नदरेक हाडून दिलें. हाची दखल घेवन खंडपिठान सरपंचान सादर केल्लें प्रतिज्ञापत्र चुकीचें आशिल्ल्याचें निरिक्षण नोंद करून तांकां 25 हजार रुपयांचो दंड दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
