भांगरभूंय | प्रतिनिधी
पणजी: गोंय कामगार कल्याण मंडळ गोंयांतल्या उद्देगीक कामगारांच्या फायद्या खातीर खुबश्यो कल्याणकारी येवजण्यांची अंमलबजावणी करता. 2023-2024 वर्सा खातीरय राज्यांतल्या पात्र उद्देगीक कामगारांक ह्या येवजण्यांखाला मदत आनी लाव दिवपाचो मंडळाचो प्रस्ताव आसा.
उद्देगीक कामगार वा कर्मचार्यांच्या शाळेंत वचपी भुरग्यांक पुस्तकां, चोपड्यो खरेदी करपा खातीर आर्थीक मदत, पयली ते चोवथी मेरेनच्या वर्गांत शिकपी भुरग्यां खातीर गणभेसाची पुरवण करपा खातीर अर्थीक मदत, शाळां आनी म्हाविद्यालयांनी शिकपी भुरग्यांक शिश्यवृत्ती येवजण, मंडळ वा विद्यापीठाचे निमणे परीक्षेंत घेतिल्ल्या गुणांच्या आदाराचेर अर्थीक मदत येवजण.
चली विद्यार्थीनीक शाळा/म्हाविद्यालयांतल्या हजेरी प्रमाण 5 वी वर्गा सावन फुडल्या खंयच्याय मळावेल्या शिक्षणा मेरेन सर्थीक मजत येवजण. ह्या शिक्षणीक येवजण्यांचो लाव घेवपा खातीर अर्ज करपाची निमणी तारीख 30 सप्टेंबर 2023 अशी आसा.
तशेंच मंडळावतीन उद्देगीक कामगार वा कर्मचार्यां खातीर वक्लां खरेदी, बायल कामगारांक जल्मल्ल्या भुरग्याची काळजी घेवपाक प्रसूती तारखे सावन 6 म्हयन्यांची रजा, उद्देगीक कामगार वा कर्मचार्यां खातीर खेळां सर्ती आनी समाजीक-सांस्कृतीक कार्यावळ आयोजना खातीर मदत, अभ्यास दौर्या खातीर मदत, मनोरूग्ण भुरग्यांच्या उपचारा खातीर मदत, गोंय कामगार निधींतल्यान वाचपघरां खातीर मदत, स्टरिलायजेशना खातीर अतिरिक्त अर्थीक भरपाय, क्षयरोग उपचारा खातीर मदत, कामावयल्यान कमी/कपात केल्ल्या कामगारांक अर्थीक मदत, बेकार आशिल्ल्या कामगारांक अर्थीक मदत, स्त्री सखी येवजणे खाला सॅनीटरी नॅपकीन वेंडींग मशीन आनी इन्सीनरेटरा खातीर मदत येवजण राबयता.
शिक्षणीक येवजण्यांचो लाव घेवपा खातीर कामगार स म्हयन्यां परस चड काळ सतत सेवेंत आसपाक जाय. ह्या येवजण्यांचो लाव घेवपा खातीर उद्देगीक कामगार आनी कर्मचार्यांनी आपल्या मालकां वरवीं सचीव, गोंय कामगार कल्याण मंडळ, श्रमशक्ती भवन, चोवथो माळो, पाटो प्लाझा, पणजी गोंय ह्या नाम्याचेर अर्ज करचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
