भांगरभूंय | प्रतिनिधी
पावसांत पर्यटक येवचे म्हूण सुरू केले खेळ
पणजी : पावसाच्या दिसांनी लेगीत गोंयांत पर्यटक येवचे म्हूण उदका खेळ कार्यावळींक बंदर कप्तान कचेरेची मान्यताय दिल्या. सुरक्षेचे उपाय घेवन साळ, शापोरा, जुवारी, दोना पावल, मांडवी, निर्ला, सिकेरी ह्या न्हंयांनी उदका खेळ कार्यावळी करपाक मेकळीक आसा.
ऑपरेटरांनी पर्यटन खात्या कडल्यान हरकत ना दाखलो घेतले उपरांत बंदर कप्तान खात्या कडेन अर्ज करचे पडटले. बंदर कप्तान खात्यान संबंदीत ऑपरेटरां कडल्यान सुचोवण्यो मागयल्यात. पर्यटकांचे सुरक्षेची जापसालदारकी ऑपरेटरांची आसतली. सकाळीं 9 ते सांजे 6 मेरेन उदकाचे खेळ चलोवपाची मान्यताय आसा. सांजे 6 उपरांत उदकाचे खेळ चलोवपाक मेळचे नात.
हवामान पुरक नासत जाल्यार उदकाच्या खेळांच्यो कार्यावळी बंद करच्यो पडटल्यो. बंदर कप्तान कचेरी वा हवामान खत्या कडल्यान सुचोवणी आयल्यार उदका खेळाच्यो कार्यावळी बंद करच्यो पडटल्यो. नुस्तेमाऱ्यां कडल्यान हरकती वा सुरक्षेच्या कारणा खातीर परवानो रद्द करपाचे अधिकार बंदर कप्तान कचेरेक आसात.
गोंय हें संवसारांतलें फामाद पर्यटन थळ आसा. उदका खेळाच्या कार्यावळींक पर्यटकांचो प्रतिसाद वाडत आसा. हे फाटभुंयेर पावसांत लेगीत उदका खेळ सुरू दवरपाक सरकारान मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
