उगें – सांग्यार घराक उजो लागून गोबर

भांगरभूंय | प्रतिनिधी

सांगेंः खुटेमळ उगें सांग्यार पेद्रीण डायस हिच्या घराक काल (शुक्रारा) फांतोडेर उजो लागून घराचो गोबर जालो. पूण सुदैवान जिवीतहानी जावंक ना.

मेळिल्ले म्हायती प्रमाण पेद्रीण डायस हिचीं ल्हानशीं दोन चुट्टांचीं घरां आसात. एका घरांत रांदप जेवप जातलें, जाल्यार दुसऱ्या घरांत न्हिदप जातालें. पेद्रीण डायस आनीं भुरगीं रातची जेवन दुसऱ्या घरांत न्हिदपाक गेलीं. जेन्ना ती सकाळीं फांतोडेर चार वरांचेर रांदपाक उठली तेन्ना घराक उजो लागिल्ल्याचें तिका दिसलें. तिणें गांवच्या लोकांक जागयलें. गांवच्या लोकांनी उजो पालोवपाचो यत्न केलो. पूण ताचे पयलींच घरा बरोबरच पयशे, भुरग्यांचे पासपोर्ट, रेशन कार्ड, आधार कार्ड, भुरग्यांचीं सर्टिफिकेट, कपडे आनी हेर सामानाचो गोबर जाल्लो, तशेंच भायर आशिल्ले स्कुटरिनूय पेट घेतिल्लो.

मजगतीं, ह्या संकश्टा वेळार तिका आदार दिवपाचो उलो पंच मार्कुश पेरेरा हाणें मारला.